Áleýmettik jelilerde Antıkor tóraǵasynyń atyn jamylǵan akkaýnttar anyqtaldy
ANKARA.KAZINFORM — Sybaılas jemqorlyqqa qarsy qyzmet áleýmettik jelilerde Agenttik basshylyǵy men qyzmetkerleriniń atynan jalǵan akkaýnttar men paraqshalar ashýdy doǵarmaı otyrǵan alaıaqtar týraly taǵy da eskertti.
Agenttiktiń málimetinshe, Facebook áleýmettik jelisinde Sybaılas jemqorlyqqa qarsy is-qımyl agenttiginiń Tóraǵasy Ashat Jumaǵalıdiń atynan ashylǵan jalǵan paraqsha anyqtalǵan.
— Bul Tóraǵanyń jeke paraqshasy emes ekenin eskertemiz. Qazirgi ýaqytta mundaı jalǵan paraqshany buǵattaý jumystary júrgizilip jatyr, — dep málimdedi agenttikten.
Sybaılas jemqorlyqqa qarsy qyzmet Tóraǵasynyń resmı paraqshasy kelesi siltemede: Facebook, Instagram.
— Tóraǵanyń atyn jamylyp, kúdik týǵyzatyn mazmundaǵy ózge paraqshalar men akkaýnttarǵa senbeýlerińizdi suraımyz. Mundaı jaǵdaılar men habarlamalar anyqtalǵan jaǵdaıda Qazaqstan Respýblıkasynyń Quqyq qorǵaý organdaryna dereý habarlaýlaryńyzdy suraımyz, — delingen habarlamada.
Eske sala keteıik, buǵan deıin júrgizýshi kýáligin 10 sáýirge deıin aýystyrý kerek degen feık aqparat taraǵan edi.