Áleýmettik jeli men messendjerlerdegi jeke chattar baqylaýǵa alynǵany ras pa
ASTANA. KAZINFORM - Jalǵan aqparatqa qarsy is-qımyl ortalyǵy áleýmettik jelilerde Qazaqstan Respýblıkasy Qarjylyq monıtorıng agenttigi tarapynan áleýmettik jeliler men messendjerlerdi paıdalanýshylardy «jappaı ańdý» týraly tarap jatqan negizsiz aqparattardy anyqtady.
Ortalyq taratqan málimetterge qaraǵanda, is júzinde Agenttik usynǵan ınternettegi tyıym salynǵan kontenttiń taralýyna qarsy is-qımyl jónindegi Qaǵıdalar tek ashyq ári jalpyǵa qoljetimdi derekterdi (qarjy pıramıdalaryn jarnamalaýǵa, onlaın-kazınolar men zańsyz lotereıalardy nasıhattaýǵa qatysty jarııalanymdar men reposttardy) monıtorıngileýge baǵyttalǵan.
Atalǵan Qaǵıdalarda azamattardyń jeke hat almasýyna eshqandaı monıtorıng júrgizý kózdelmegen. Bul týraly Agenttiktiń ózi de birneshe ret resmı túsinikteme bergen bolatyn.
- Osylaısha, jeke habarlamalardy «baqylaý» týraly málimdemeler shyndyqqa janaspaıdy jáne qoǵamdy ádeıi jańylystyrý bolyp tabylady, - delingen habarlamada.
Jalǵan aqparatqa qarsy is-qımyl ortalyǵy BAQ ókilderi men tsıfrlyq kontent avtorlaryn aqparatty jarııalaýda jaýapty bolýǵa, faktilerdi burmalamaýǵa jáne azamattardyń shynaıy aqparat alý quqyǵyn qurmetteýge shaqyrady.
Osyǵan deıin Konstıtýtsııa jobasyna qatysty jalǵan aqparat taratqandar jaýapqa tartylǵany týraly jazdyq.