Áleýmettik jeliler adamnyń qaıǵysyn realıtı-shoýǵa aınaldyrdy – Baqytjan Buqarbaı
ASTANA. KAZINFORM – Jazýshy ári saıasattanýshy Baqytjan Buqarbaı áleýmettik jelilerdegi adam qaıǵysyn jarııa túrde kórsetý men ony tabys tabý quralyna aınaldyrý qoǵamǵa keri áser etip jatqanyn aıtty.
Ol bul pikirin Dala podcast efırinde bildirdi.
– Biz tarıhı kúreste shyńdaldyq, barlyq jaýymyzdy jeńip, táýelsizdikke qol jetkizdik. Jońǵarlar qaıda, biz qaıdamyz? Búginde bizge syrttan qaýip tóndirip turǵan tejeýshi faktorlar joq, – dedi Baqytjan Buqarbaı.
Onyń aıtýynsha, Qazaqstan óziniń qýatty memleket ekenin áldeqashan dáleldegen. Soǵan qaramastan, jekelegen medıatulǵalar men blogerler qoǵamda jasandy túrde qaıǵy-qasiret kýltin qalyptastyryp, baqytsyzdyq obrazyn dáriptep keledi.
– Aýrý balalardyń beınesi men ózgeniń qaıǵysyn áleýmettik jelidegi qaralym men tabys úshin paıdalaný realıtı-shoýǵa aınaldy. Bul quqyqtyq ári etıkalyq normalardy óreskel buzady, – dedi ol.
Saıasattanýshynyń pikirinshe, adam qaıǵysyn kontent pen qarjylyq paıda úshin paıdalanýdyń saldarynan qoǵamnyń oılaý júıesi ózgeredi, adamdardyń bir-birine degen shynaıy janashyrlyǵy álsireıdi. Sondyqtan mundaı áreketterge memleket tarapynan qatań tosqaýyl qoıylýy qajet.
Sonymen qatar Baqytjan Buqarbaı gadjetterge shamadan tys táýeldilik pen zeıinniń tómendeýi jas urpaqtyń tereń analıtıkalyq oılaý qabiletine keri áser etip jatqanyn aıtty.
