Áleýmettik jelige kirýshilerdi jasyna qaraı shekteıtin zań jobasy talqylaýǵa shyǵarylady

ASTANA. KAZINFORM – Premer-mınıstrdiń orynbasary, Mádenıet jáne aqparat mınıstri Aıda Balaeva Úkimet otyrysynda V Ulttyq quryltaıda ózi jetekshilik etetin salalar boıynsha aıtylǵan usynystar men tapsyrmalar qalaı oryndalatynyn aıtty.

- Ulttyq quryltaı músheleriniń usynystaryn eskere otyryp, BAQ salasyndaǵy zańnamany jetildirý jumysy jalǵasady. Atap aıtqanda, balalar men jasóspirimderdiń áleýmettik jelige qol jetkizý múmkindigin shekteý máselesi qarastyrylyp jatyr. Mádenıet jáne aqparat mınıstrligi onlaın platformalar men mass-medıaǵa qatysty zańnamaǵa tıisti ózgerister men túzetýler ázirledi. Atalǵan ózgerister saraptamadan ótip, qoǵamdyq talqylaýǵa shyǵarylady, - dedi vıtse-premer.

Sondaı-aq, bul máselede ol jas shekteýin buzý jaýapkershilikke ákelip soǵýy múmkin ekenin atap ótti.

- Oqý-aǵartý mınıstrligimen, Jasandy ıntellekt jáne tsıfrlyq damý mınıstrligimen birge paıdalanýshylardyń jasyn tekserý mehanızmderin ázirlep, tipti jaýapkershilik sharalaryn qarastyrýdy josparlap otyrmyz, - dedi Aıda Balaeva.

Eske salsaq, keshe Ulttyq quryltaıdyń aqyrǵy otyrysy ótip, jasóspirimderdiń áleýmettik jelidegi belsendiligin retteýmen baılanysty usynys aıtylǵan edi.