Áleýmettik jelige kontent túsirmek bolǵan almatylyq buzaqy júrgizýshiler jazalandy
ASTANA. KAZINFORM – Almatyda áleýmettik jelige kontent túsirý úshin jol qozǵalysy erejelerin óreskel buzǵan júrgizýshiler jaýapqa tartyldy, dep habarlaıdy QR Іshki ister mınıstrligi.
Áńgime agressıvti kólik júrgizý, jyldamdyqty asyrý, qaýipti manevrler jasaý, drıft jáne «shashka» tásilimen júrý faktileri týraly bolyp otyr.
Polıtsııanyń málimetinshe, quqyq buzýshylar óz áreketterin áleýmettik jelilerde ózderi jarııalaıtyn jaǵdaılar jıi kezdesedi. Bul olardyń jeke basyn jedel anyqtaýǵa múmkindik beredi. Sońǵy birneshe kúnde áleýmettik jelilerge júrgizilgen monıtorıng barysynda bes avtobuzaqy anyqtalyp, olardyń barlyǵy ákimshilik jaýapkershilikke tartyldy.
Almaty qalalyq Polıtsııa departamenti ınternet keńistigine monıtorıng turaqty júrgiziletinin jáne qaýipti kólik júrgizýdiń árbir deregine quqyqtyq baǵa beriletinin málimdedi.
Polıtsııa qala kósheleri avtojarys ótkizýge nemese ekstremaldy kontent túsirýge arnalmaǵanyn eske saldy.
Buǵan deıin Almatyda birneshe saǵat ishinde 28 avtokóliktiń aıyp turaǵyna qoıylǵany habarlanǵan edi.
Sondaı-aq Almatyda túngi ýaqytta drıft jasaǵan BMW avtokóliginiń júrgizýshisi jazalandy.
