Áleýmettik jelidegi jalǵan em halyq densaýlyǵyna qaýip tóndirip otyr — depýtat
ASTANA. KAZINFORM — Májilis depýtaty Gúldara Nurym Premer-Mınıstrdiń orynbasary – Mádenıet jáne aqparat mınıstri Aıda Balaevanyń atyna depýtattyq saýal joldap, áleýmettik jelilerdegi jalǵan medıtsınalyq keńester men bıologııalyq belsendi qospalardyń (BBQ) baqylaýsyz jarnamasyna qatysty másele kóterdi.
Depýtattyń aıtýynsha, búginde áleýmettik jeliler emdeý, dári qabyldaý jáne medıtsınalyq keńes taratatyn negizgi alańdardyń birine aınalǵan. Sonyń saldarynan dárigerge qaralmaı, ınternettegi keńeske súıenip óz betinshe em qabyldaıtyndar kóbeıgen.
— Azamattardyń 42 %-y keminde bir ret áleýmettik jelidegi keńeske súıenip, dárigerge qaralmaı em qabyldaǵan. Bul antıbıotıkterge tózimdiliktiń artýyna, dárilerdiń janama áseriniń kóbeıýine jáne aýrýlardy kesh anyqtaýǵa ákeledi, - dedi Gúldara Nurym.
Onyń sózinshe, medıtsınalyq bilimi joq adamdar da áleýmettik jelide ózin maman retinde kórsetip, túrli emdeý tásilderin usynyp júr. Keı jaǵdaıda olar retseptimen beriletin dárilerdi de jarnamalaıdy.
Depýtat bıologııalyq belsendi qospalardyń dári retinde nasıhattalýy da úlken másele ekenin aıtty.
— Qazir elde BBQ naryǵy baqylaýsyz qalyp otyr. Adamdarǵa em retinde tıimdiligi dáleldenbegen ónimder usynylady. Bul aýrýdyń asqynýyna jáne dertti kesh anyqtaýǵa sebep bolýy múmkin, - dedi ol.
Sonymen qatar depýtat dárigerler arasyndaǵy daýlardyń áleýmettik jelide ashyq talqylanýy medıtsına salasyna degen senimge keri áser etip otyrǵanyn aıtty.
Osyǵan baılanysty Gúldara Nurym áleýmettik jelidegi jalǵan medıtsınalyq jarnamaǵa baqylaýdy kúsheıtip, barlyq BBQ boıynsha ashyq tizilim jasaýdy usyndy.
Sondaı-aq depýtat emdeý men dári-dármek týraly aqparat jarııalaıtyn avtorlardy dárigerge qaralý qajettigin eskertýge mindetteýdi usyndy.
Aıta keteıik, Májilis depýtaty Sergeı Ponomarev Qazaqstanda ókpe obyryn erte anyqtaıtyn júıeniń áli kúnge deıin engizilmeı otyrǵanyn synǵa alǵan edi.
