Áleýmettik jelidegi psıhologter qyzmeti qalaı retteledi – mınıstrlik
ASTANA. KAZINFORM — Búgin Májiliste psıhologııalyq qyzmetke qatysty zań qyzý talqylandy. Depýtattar jańa qujatta jaýapkershiliktiń jetispeıtinin aıtyp, tolyqtyrý qajettigin aıtty. Bul rette, ásirese áleýmettik jelide psıhologııalyq qyzmet kórsetý qalaı retteletinin Mádenıet jáne aqparat birinshi vıtse-mınıstri Qanat Ysqaqov túsindirdi.
Mınıstrlik ókili qazir áleýmettik jelide onlaın konsýltatsııalar kóbeıgenin atap ótti. Qarapaıym turǵyndardyń ózi psıhologııalyq nemese qarjylyq konsýltatsııalardy aqshaǵa satyp alýǵa daıyn ekenin kórsetip otyr.
— Sondyqtan depýtattyq korpýspen jáne basqa da memlekettik organdarmen birlesip, psıhologııalyq qyzmet kórsetý salasyn retteý qolǵa alyndy. Basty maqsat – halyqty sapaly ári ashyq psıhologııalyq kómekpen qamtamasyz etý. Sonymen qatar jalǵan aqparattyń taralýyna jol bermeý, alaıaqtyqtyń aldyn alý jáne tıimdi qyzmet kórsetýdi kózdep otyrmyz, — dedi Qanat Ysqaqov Jibek Joly telearnasyna bergen suhbatynda.
Buǵan qosa, zań jobasy aıasynda ýákiletti organnyń qaramaǵynda arnaıy reestr jasalady. Atalǵan tizilimge tıisti dıplomy nemese sertıfıkaty bar bilikti psıhologtar engiziledi. Zań talaptaryna sáıkes, reestrge enbegen mamandar psıhologııalyq qyzmet kórsetý quqyǵynan aıyrylady.
— Tizilim ashyq túrde jarııalanady. Osylaısha, psıhologııalyq kómekke júgingen árbir azamat mamannyń biliktiligin tekserip, senimdi ári kásibı psıhologty tańdaı alady, — dedi birinshi vıtse-mınıstr.
Spıkerdiń aıtýynsha, qazirgi tańda áleýmettik jelilerde jalǵan «psevdopsıhologtar» kóbeıgen. Osyǵan baılanysty halyqtyń medıasaýatyn arttyrý erekshe mańyzǵa ıe.
Mamandar azamattardy kez kelgen aqparatty muqııat tekserýge shaqyrady.
Atap aıtqanda, usynylatyn qyzmet boıynsha psıhologtyń lıtsenzııasyn tekserip, resmı kelisimshart jasaý qajet. Bul sharalar psıhologııalyq qyzmet kórsetý sapasyn arttyryp, alaıaqtyq áreketterdiń aldyn alýǵa baǵyttalǵan.
Aıta keteıik, «Psıhologııalyq qyzmet týraly» zań jobasy Parlament Májilisiniń birinshi oqylymynda maquldandy.
