Áleýmettik jelidegi erkindik jaýapkershilikpen qatar júrýi kerek — saıasattanýshy
ASTANA. KAZINFORM — Búginde Qazaqstan halqynyń 96 paıyzy áleýmettik jelilerdi turaqty paıdalanyp, aqparat alady. Bul týraly saıasattanýshy Maqsat Jaqaý aıtty.
Tsıfrlyq platformalar qoǵamnyń túrli salalarynyń damýyna múmkindik bergenimen, ınternettegi erkindik jaýapkershilikpen qatar júrýi kerek.
— Áleýmettik jelide ár adamnyń quqyǵy men ar-namysy saqtalýǵa tıis. Tsıfrlyq ortada ózara qurmet pen syılastyq qaǵıdattary mańyzdy, — dedi saıasattanýshy.
Sonymen qatar Maqsat Jaqaý ulttyq qundylyqtarǵa jáne balalardyń qaýipsizdigine keri áser etýi múmkin kontentke qatysty tıisti shekteýlerdiń mańyzyn atap ótti.
Onyń pikirinshe, áleýmettik jelidegi erkindik pen sóz bostandyǵy qoǵam aldyndaǵy jaýapkershilikpen úılesýi qajet.
Eske salaıyq, buǵan deıin jazýshy ári saıasattanýshy Baqytjan Buqarbaı áleýmettik jelilerdegi adam qaıǵysyn jarııa túrde kórsetý men ony tabys tabý quralyna aınaldyrý qoǵamǵa keri áser etip jatqanyn aıtqan edi.
