Áleýmettik jelidegi alaıaqtyqpen kúresý úshin jumys toby qurylady

ASTANA. KAZINFORM — Mádenıet jáne aqparat mınıstri Aıda Balaeva Meta kompanııasymen yntymaqtastyqtyń negizgi baǵytyna toqtaldy. 

— Biz áleýmettik jelilerdiń barlyǵymen, onyń ishinde Meta-men de dıalog júrgizip jatyrmyz. Ózara jaqsy qarym-qatynas ornaǵan. Olar zańǵa qaıshy kontentterdi joıýda jáne taratpaýǵa úlken kómegin kórsetip jatyr. Biraq taǵy bir másele, ózderińiz de kórip otyrǵandaı, alaıaqtyq jarnamalardyń taralýy jıilep ketti. Aýqymy óte úlken. Bul jaıt tek bizdiń mınıstrlikti ǵana emes, sonymen qatar Meta kompanııasyn da alańdatady. Sondyqtan birlesken jumys tobyn qurý, máseleni tehnıkalyq retteý týraly sheshim qabyldadyq, — dedi mınıstr Aqordada BAQ ókilderine bergen suhbatynda.

Buǵan deıin Qazaqstan Meta-men birge JI mamandaryn ázirleıtin baǵdarlamany iske qosatynyn jazǵan edik.

Aıta keteıik, qazirgi ýaqytta Aqordada Memleket basshysy Qasym-Jomart Toqaev pen Italııa Premer-mınıstri Djordja Melonı joǵary deńgeıde kelissóz júrgizip jatyr.