Áleýmettik jelide jeńildik jasaýdy suraıdy — Aqtóbedegi jalǵyz áıel qyzmet ınspektory
Moped, skýterdi tirkeý, velosıpedti urylardan qorǵaý. Aqtóbe qalalyq PB patrýldik polıtsııa batalonynyń jalǵyz áıel qyzmet ınspektory, maıor Ásem Prmaǵanbet qazir áleýmettik jeli arqyly jasóspirimdermen, jastarmen sóılesip, olarǵa quqyqtyq keńes beredi. Inspektor áleýmettik jelini qoǵammen baılanys quralyna aınaldyryp, aqtóbelikterdiń nazaryna ilikti. Kazinform tilshisi el aýzynda júrgen polıtsııa qyzmetkerimen kezdesip, sóılesti.
— Siz Aqtóbedegi patrýldik polıtsııa batalonynda shaqyrtýǵa baratyn, kóshedegi tártipti baqylaıtyn jalǵyz názik jandy qyzmetkersiz. Áńgimeni aldymen tanystyqtan bastaıyq…
— 2011 jyldan bastap ishki ister organdarynda qyzmet etemin. ıAǵnı eńbek ótilim joǵary oqý ornyna túsken kezden bastalady. Astanadaǵy Qarjy polıtsııasy akademııasynda 4 jyl bilim alyp, Aqtóbede anyqtaýshy, tergeýshi boldym. Sodan keıin Aqtóbe qalalyq polıtsııa basqarmasyna aýystym. 2023 jyldan bastap patrýldik polıtsııa batalonynda qyzmet etip júrmin.
— Anyqtaýshy men tergeýshi bolǵan ekensiz. Kóbine qandaı ister tústi?
— Áıel zaty bolǵandyqtan kishkentaı qyz balalarǵa, jasóspirimderge qatysty jasalǵan seksýaldyq zorlyq-zombylyq isterdi tergedim. Odan bólek alaıaqtyq, tonaý, qaraqshylyq isterin de qaradym. Anyqtaýshy — jeńil jáne ortasha aýyr qylmysty tergeıdi. Máselen jaı ǵana urlyq bolsa, bul anyqtaýshynyń jumysy. Al asa iri mólsherde zalal keltirse, uryp, zatyn tartyp alsa, tergeýshilerdiń jumysy.
— Anyqtaýshynyń da, tergeýshiniń de jaýapkershiligi joǵary. Sol qyzmetten patrýldik polıtsııa qyzmetine qalaı aýystyńyz?
— Kishkentaı kezimde patrýldik polıtsııa qyzmetiniń kólikterin kórip, osy salada eńbek etýdi armandadym. Aqtóbede osy salada Janat Ahetova jumys istedi. Aqtóbelikter Zena laqap atymen tanıdy. Soǵan qarap eliktedim, «osyndaı bolǵym keledi» dedim. Bir salada júrgen soń ony kórdim, tanydym. Óse kele múmkindik bolyp, aýystym. Bul qyzmetke aýysqanyma 2 jyl toldy.
— Jyldar neni ózgertti? Ne kórip, ne túıdińiz?
— Ákimshilik polıtsııa basqarmasynyń patrýldik polıtsııa batalonyna qyzmetke kelgen soń oı-tanymym keńeıdi, adamdar arasyna jıi shyqtym. Shaqyrtý aldymen patrýldik polıtsııaǵa túsedi, sondyqtan oqıǵa ornyna birinshi jetetin de biz. Qalada bolyp jatqan barlyq oqıǵa, qylmysty birden bilip, habardar bolyp otyramyz. Jumysqa tańerteń baryp, keshki 18:00–de shyǵyp ketý degen joq. 12 saǵattyq jumysqa men de, meniń otbasym da úırengen. Degenmen áriptesterim túngi aýysymǵa shyǵarmaýǵa tyrysady. Úsh kún kúndiz, úsh kún túngi aýysym, sodan soń bir kún demalys. Tergeýshiniń de jumysy dál osylaı ótedi. Bul men armandaǵan, qalap oqýǵa túsken sala.
— Astanada bilim aldyńyz, jetildińiz. Jas mamandar oqyp-toqyǵan jerinde qalǵysy keledi, tipti qalyp qoıady. Al siz Aqtóbege oraldyńyz. Nege?
— Bul meniń týǵan jerim. Sonymen birge Astanada qalý týraly oılaǵanymmen, mende qorqynysh boldy. Munda ata-anam bar. Bir jaǵynan jumys istep, óz eńbegimmen tapqan nanymdy jegizgim keldi.
— Anyqtaýshy, tergeýshi, polıtsııa ınspektory qyzmetterin atqardyńyz, áli de osy salada jumys istep kelesiz. Sizge áser etken, oı salǵan is týraly aıtyp berseńiz…
— Ómir bolǵan soń keıde erli-zaıypty ajyrasady, bala anasymen qalady. Keıin áıel óz baqytyn keziktirip, qaıta turmysqa shyǵady. Ókinishtisi ógeı áke balany óz balasyndaı qabyldaı bermeıdi. 14 jasqa deıingi qyzdarǵa qatysty jasalatyn kóp qylmysty ógeı áke nemese bógde er adamdar jasaıdy. Tergeýshi bolyp júrgen kezde bir oqıǵa boldy. Áıel óz qyzymen ashyq sóılespeıdi. Al qyz aýylǵa barǵanda basynan ótken jaǵdaıdy ájesine aıtyp bergen. Ógeı ákesi seksýaldyq sıpattaǵy zorlyq jasaǵan. Ájesi aryz jazǵan soń anasyn shaqyrtyp aldyq. Qylmystyq is rastalyp, ózbekstandyq azamattyń isi áshkere boldy. Sol kezde qyz balada psıhıkalyq aýytqýlar kórindi. Ony bir aıǵa aýrýhanaǵa jatqyzyp, saraptama taǵaıyndaldy. Áıel «ótirik aıtady» dep qyzyna senbeı, azamattyq nekedegi er adamdy jaqtap otyrdy. Jasóspirimge qoldaý kórsetip, kıim-keshek de aparyp berdim. Qazir sol oqıǵa esime tússe, qyzdy qaıta týyp alyp, jaǵdaıyn bilgim keledi. Al er adamnyń kinási dáleldenip, sottaldy. Tipti onyń Ózbekstandaǵy áıeli de keldi. Taǵy bir oqıǵa esime tústi. Áleýmettik jeli arqyly Qostanaı qalasynyń turyǵyny jazdy. Jasóspirim qyz ógeı ákesiniń seksýaldyq zorlyq jasaǵanyn aıtty. Men isti tirkep, áriptesterime jiberdim. Ol da anasyna aıtqan, anasy senbegen. Mundaı da jaǵdaı boldy.
— Ata-analardyń qateligi nede?
— Ata-ana balalarymen sóılespeıdi, sóılese almaıdy. Qazir men áleýmettik jelilerde paraqshalar júrgizemin. Bozbalalar moped, skýter aıdaıdy. Olarǵa arnap jol erejesi men talaptaryn túsindiremin. Jaqynda «JAS KEÑES SIYLIĞI» baıqaýynda jeńimpaz atandym. Qalaı? Men jasóspirimderge birtaban jaqynmyn. Olar maǵan habarlama jazady, keńes suraıdy, jaqyn tartady. «Ana-anańa aıttyń ba?» dep suraımyn olardan. Kóbi jasyryp qalǵanyn, eger bilip qalsa, urysatynyn aıtady. Bul neni bildiredi? Demek ata-ana óz balasymen durys sóılespeıdi. Meniń balam qazir balabaqshada. Ol úıge kelgende byldyrlap túsindiredi. Uryspaı, sóılesip, barlyq mán-jaıdy bilip alýǵa bolady.
— Demek ata-ana balamen jaı ǵana sóılesip, ony baqylaýda ustaı ala ma?
— Iá, dál solaı. Eger bas salyp uryssańyz, bala sizge syryn aıtpaıdy, jabylyp qalady. «Aıqaılaıdy, ne isteımin oǵan aıtyp» deıdi. Baıqaýǵa qatysqan kezde uıymdastyrýshylar onlaın baılanysqa shyǵyp, jumystyń qalaı ótip jatqanyn bildi. Men sol kezde patrýlde júrdim. Skýter aıdap júrgen bozbalanyń izinen qýyp júrgende ol kóligin tastap, ózi qasha jóneldi. Bir kezde áleýmettik jeli arqyly «Apaı, sońymnan polıtsııa qýyp keledi. Skýterdi tastap kettim. Olardyń is-áreketi durys pa?» dep jazypty. Men «skýterdi tastaǵan jerge kel» dep jazyp jiberdim. Keldi, kórdi, kúldi. Onyń sońynan qýyp kele jatqan men edim. Aıttym, jol erejesin túsindirdim. Polıtsııa eskertý berdi me, toqtaý kerek. Ata-anasy balasynda skýter bar ekenin de bilmeıdi. Olar qymbat telefon alyp bergen, al balasy ony satyp, stýker alǵan. Aıyppul salyndy. Keıin anasy alǵysyn aıtty.
— Al jasóspirimderdiń qateligi nede?
— Der kezinde aıtpaı, jasyryp qalady.
— Áleýmettik jelide akkaýnt ashyp, ony júrgizesiz. Demek bul da sizge qosymsha jumys…
— Jasandy ıntellekt damyp jatyr, jastar, jasóspirimder sol áleýmettik jelide otyrady. Demek biz de osy múmkindikti paıdalanýymyz kerek. Keıbir adam «Basqa jumys joq pa, ne istep otyrsyńdar?» dep aıtady. Bul qate túsinik. Onda men artyq eshteńe aıtpaımyn, qarapaıym jolmen zań talaptaryn, jol erejesin túsindiremin. Tipti skýterdi tirkeý qıyn dep oılap júrgenderge kóp kómek boldy. Skýter, qujat, ata-anasy. Mine, bar bolǵany osy ǵana kerek.
— Sizdiń akkaýntyńyzǵa jazylýshylar kóp pe?
— Eki akkaýnt bar. Biri patrýldik polıtsııanyń, biri ózimdiki. Ekeýine 40 myńǵa jýyq adam jazylǵan.
@asema.alibekovna #vrekomendatsıı #popýlıarnoe #vrekı #hochývrekomendatsıı #vrekı ♬ Mesıats - Palina
— Qalaı bastaldy?
— Qalada jedel aldyn alý sharasy júrip jatyr. Bir kezde kóshe qıylysynda baǵdarsham isten shyǵyp, maǵan jol qozǵalysyn retteý júkteldi. Sol kezde syrtymnan áldebireý túsirip alyp, áleýmettik jelige júktegen. Tanylyp, keıin áriptesterim osyndaı oı saldy. Shynynda da jazylýshylar kóbeıdi.
@patrul_polisia_aktobe Vstrechaıte nashý versııý 👮🏻👮🏻♂️ #vrekomendatsıı #vrekı #popýlıarnoe #hochývrek #krash #kontent #rabota #batalon #102 #trekı #aktobe04 #unik #rekomendasi @patrul.police_aktobe @aqtobe_polisiabasqarmasy @نور⚫️ ♬ orıgınalnyı zvýk - patrul_polisia_aktobe
— Áriptesterińiz jeńildik jasaı ma?
— Demalys beredi, túngi emes, kúndizgi aýysymǵa qoıady. Kishkentaı balam bolǵan soń tamaqtanýǵa, demalýǵa ruqsat beredi. Qujattarmen jumys istep, ózderi syrtqa shyǵady. Al shaqyrtýǵa barǵanda hattama toltyramyn, áriptesterim ashýlanyp turǵan adamdardy tynyshtandyrady. Jol boıynda kóp adam iltıpat bildiredi. Keıde kólikpen qýyp jetip, hattama tolytyrýdy suraıtyndar bar. Áleýmettik jelide jeńildik jasaýdy da suraıdy. Biraq bárin de zań retteıdi.
— Keńes berseńiz…
— Áke, ana, bala. Bul úsheýi únemi bir bolyp, bir-birimen ashyq áńgime qurýy tıis. Qazir bala ınternette otyrady, ata-ana shet qaldy. Sol olqylyqtyń ornyn toltyrý úshin biz áleýmettik jelige shyqtyq. Balalar tanıdy, biledi, zań talaptaryn túsinedi. Kún saıyn tirkeletin qylmysqa analız jasalyp, sodan keıin vıdeo túsiremiz. Máselen velosıped urlyǵy kóbeıdi jazda. Sodan soń biz velosıpedti urlap ketpeýi úshin ony qaıda qoıý keregin, qalaı qorǵaýdy túsindiremiz. Elektrsamokatty aıdaýdyń de erejesin kóp jazylýshy biz arqyly bildi. Aıtar keńesim, jolda eshqaıda asyqpaý kerek. Qazir adamdar áldeqaıda asyǵyp júredi ǵoı. Sodan soń jol belgilerine qaraý kerek. Baǵdarsham istemeı qalǵan kezde júrgizýshiler bir-birine jol bermeı júredi. Biz aıtqannyń, kórsetkenniń 1-2% oıǵa túıip, túsinse, ákimshilik quqyqbuzýshylyq, qylmys azaıady. Qashanda adam adam bolyp qalýy kerek.
— Sizdi ne erekshelendiredi?
— Boıym uzyn. Adamdardyń esinde solaı qalatyn sııaqtymyn.