Áleýmettik jelide jalǵan paraqsha ashyp, turǵyndardy aldaǵan kúdikti ustaldy

ASTANA. KAZINFORM – Elordada Instagram áleýmettik jelisi arqyly jalǵan paraqsha ashyp, turǵyndardy aldaǵan alaıaqtyqqa kúdikti ustaldy, - dep jazdy Polisia.kz.

Astana qalasynyń polıtsııa qyzmetkerleri áleýmettik jeli arqyly jasalǵan alaıaqtyq qylmysynyń betin ashty. Tergeý barysynda anyqtalǵandaı, 21 jastaǵy kúdikti Instagram áleýmettik jelisinde jalǵan paraqsha ashyp, ózin jıhaz satýmen aınalysatyn kásipker retinde kórsetken.

Ol túrli jıhaz túrlerin tómen baǵamen jarnamalap, «jetkizip beremin» degen ýádemen azamattardyń senimine kirgen. Ol aldyn ala tólem jasaýdy talap etip, aqshany alǵan soń baılanysqa shyqpaı otyrǵan. Nátıjesinde eki turǵyn aldanǵan. Jalpy shyǵyn kólemi 150 myń teńge bolǵan.

Onyń basqa da qylmystarǵa qatystylyǵy tekserilip jatyr.

Polıtsııa azamattardy qyraǵylyq tanytyp, osyndaı qylmystardyń qurbany bolmaýǵa shaqyrady.

Aldyn ala tólem jasamaýdy jáne satýshynyń naqty mekenjaıyn jáne resmı qujattaryn tekserýdi usynady.

– Eger siz de alaıaqtyqtyń qurbany bolsańyz, dereý «102» nómirine habarlasyńyz nemese jaqyn jerdegi polıtsııa bólimshesine júginińiz, - delingen habarlamada.

Qazir ınternet alaıaqtary aılasyn asyrý úshin túrli ádisterdi paıdalanady. Eń qaýiptisi – adam psıhologııasyna áser etý arqyly jasalatyn alaıaqtyq áreketteri.