Áleýmettik jelide zańsyz utys oıyndaryn ótkizgen tanymal ártister aıyppul tóledi

ASTANA.KAZINFORM — Elimizde áleýmettik jelilerde zańsyz utys oıyndaryn uıymdastyrǵan birqatar tanymal tulǵalar men blogerler ákimshilik jaýapkershilikke tartyldy. Bul týraly Týrızm jáne sport mınıstrliginiń Oıyn bıznesin jáne lotereıany retteý komıteti habarlady. 

Vedomstvo dereginshe, 2025 jyldyń basynan beri Ákimshilik quqyq buzýshylyq týraly kodekstiń 445-1-babynyń 6-bóligi boıynsha (Lotereıa operatory bolyp tabylmaıtyn tulǵanyń lotereıa ótkizýi) 89 adam jaýapqa tartylǵan.

Mıllıondaǵan jazylýshysy bar ınflıýenserlerge 1,1 mln teńgege deıin aıyppul salynǵan. 
Ártis Ramazan Amantaı (@Ramantay, 788 myń jazylýshy) — 100 AEK nemese 393 200 teńge aıyppul.

Ánshi ári prodıýser Móldir Muqan (@Moldir.mt, 2,3 mln jazylýshy) — 150 AEK nemese 589 800 teńge aıyppul.

Ánshi, bloger Mereke Qalbaeva (@merekusha.k, 1,3 mln jazylýshy) — 150 AEK nemese 589 800 teńge aıyppul.

Sonymen qatar tanymal blogerler juby Nurbek Nurtaza (@justking31, 7,4 mln jazylýshy) jáne Ámına Nurtaza (@aminaxo26, 6,5 mln jazylýshy) da ákimshilik jazaǵa tartylǵan. Nurbekke 300 AEK (1 179 600 teńge), al Ámınaǵa 210 AEK (825 720 teńge) aıyppul salynǵan.

Komıtet málimetinshe, 19 qyrkúıekte olar Almaty qalasynda eki qabatty úıdiń utys oıynyn jarııalap, qatysýshylardan 29 990 teńge kóleminde «oqytý kýrsyna» tólem qabyldaǵany úshin jaýapqa tartylǵan bolatyn.

Sondaı-aq utys oıyndaryn ótkizgeni úshin ydys-aıaq, perde jáne basqa da taýarlar satatyn kommertsııalyq akkaýnttar da jaýapqa tartylǵan.

Sonymen qatar zańsyz utys oıyndary áleýmettik jelilerdi monıtorıngteý jáne azamattardyń shaǵymdary arqyly anyqtalady. Keıbir buzýshylyqtarǵa qatysty túsindirý jumystary ótkizilgen.

Komıtet ókilderi túsindirgendeı, eger quqyq buzýshy ákimshilik qaýlymen kelisse, aıyppuldy óz erkimen tóleıdi, al kelispegen jaǵdaıda is sotta qaralady.

ÁQBtK-niń 445-1-babyna sáıkes, zańsyz lotereıa ótkizgeni úshin jeke tulǵalarǵa — 100 AEK, jeke kásipkerlerge — 300 AEK aıyppul salynady. Bir jyl ishinde qaıtalanǵan jaǵdaıda aıyppul mólsheri tıisinshe 200 jáne 750 AEK-ke deıin ulǵaıyp, tabys tárkilenedi.

Buǵan deıin Bloger Justking31 isi qarjylyq tekserýge jiberilgenin jazǵanbyz.

Eske sala keteıik, Májilis depýtaty Nartaı Sársenǵalıev prank arqyly qoǵamdyq tártipti buzatyn blogerlerdi qatań jaýapqa tartý qajettigin aıtty. Onyń aıtýynsha, keı blogerler adamdardy qorqytý, qoǵamdyq orynda aqymaqtyq jasaý sııaqty áreketterdi «prank» dep atap, shekten shyǵyp otyr.