Áleýmettik jelide tikeleı efırge shyqqan shymkenttik kólik júrgizýshisi jaýapqa tartyldy
ShYMKENT. KAZINFORM - Ol kóligine tyıym salynǵan qurylǵylardy ornatqan.

Avtokóligin zańsyz jabdyqtap, arnaıy jaryq sıgnaldaryn ornatqan júrgizýshini polıtseıler áleýmettik jeliden kórgen. Monıtorıng júrgizý barysynda tikeleı efırge shyqqan turǵynnyń júrgen jerin birden anyqtaǵan.
Jedel basqarý ortalyǵynyń beınebaqylaý ınspektorlary quqyq buzýshyny ustaýǵa patrýldik ekıpajdy baǵyttady.
- Júrgizýshi ákimshilik jaýapqa tartyldy. Onyń tarapynan atalǵan quqyq buzýshylyq bıyl ekinshi ret qaıtalanǵany anyqtaldy. Kólik quraly aıypturaqqa qoıyldy. Quqyq qorǵaýshylar kólik júrgizýshilerin arnaıy jaryq jáne dybys sıgnaldaryn zańsyz paıdalanýǵa qatań tyıym salynǵanyn eskertedi, - delingen Shymkent qalasy Polıtsııa departamentiniń baspasóz qyzmeti taratqan aqparatta.
Aıta keteıik, budan buryn Shymkentte adam urlamaq bolǵandardyń áreketi vıdeoǵa túsip qalǵan bolatyn.