Áleýmettik jelide Shymkenttegi birneshe mektepke shabýyl jasalady degen jalǵan aqparat tarady
ShYMKENT. KAZINFORM – Áleýmettik jelide 16 qańtarda qala mektepterinde jappaı qylmys jasalatyny jóninde jalǵan habarlama taralyp jatyr.
Alaıda polıtsııa bul aqparattyń shyndyqqa janaspaıtynyn málimdep, jaǵdaıdyń tolyq baqylaýda ekenin jetkizdi.
Qorqynysh týdyratyn jazbalar negizinen Telegram-arnalar men chattarda taralyp jatyr. Onda belgisiz tulǵalar qaladaǵy shamamen 25 mektep, gımnazııa jáne lıtseıdiń ataýyn atap, «sol jerlerge baramyz» dep qorqytady. Emotsııalyq jáne ashyq qoqan-loqqyǵa toly bul habarlamalar ata-analar men pedagogtardyń alańdaýshylyǵyn týdyrdy.
Qalalyq bilim basqarmasy taralyp jatqan aqparattyń jalǵan ekenin atap ótti.
– Áleýmettik jelilerde naqtyraq aıtqanda Telegramm kanalynda taralǵan «balanyń ómirine qaýip tónip tur» degen aqparat shyndyqqa sáıkes kelmeıdi. Qazirgi ýaqytta qaýip tóndiretin jaǵdaı anyqtalǵan joq, – dep habarlady vedomstvo.
Basqarma ókilderi jaǵdaıdyń tıisti qyzmetterdiń baqylaýynda ekenin, jalǵan aqparat kózderi tekserilip, barlyq kelip túsken habarlamalar taldanyp jatqanyn málimdedi.
– Rastalmaǵan ári emotsııaǵa negizdelgen aqparattyń taralýy qoǵamda negizsiz alańdaýshylyq týǵyzatynyn atap ótemiz. Osyǵan baılanysty tek resmı derekkózderge súıenýge jáne tekserilmegen málimetterdi taratpaýǵa shaqyramyz, – dep málimdedi vedomstvo.
Qalalyq polıtsııa departamenti de atalǵan másele boıynsha málimdeme jasady. Quqyq qorǵaý organdarynyń málimetinshe, bul – feık aqparat.
– Messendjerlerde mektepterde qylmys jasalýy múmkin degen jalǵan aqparat taralyp jatyr. Atalǵan habarlamalar shyndyqqa sáıkes kelmeıdi. Mundaı qaýesetterge senbeýdi jáne tekserilmegen aqparatty taratpaýdy suraımyz. Qazirgi ýaqytta polıtsııa tekserý jumystaryn júrgizip jatyr, barlyq qaýipsizdik sharalary kúsheıtildi. Jaǵdaı tolyq baqylaýda. Sabyr saqtap, tek resmı aqparatqa senińizder, – dep habarlady qalalyq polıtsııa departamenti.
Polıtsııa ókilderi qasaqana jalǵan aqparat taratý qylmystyq jaýapkershilikke ákep soǵatynyn eske saldy. Mundaı áreket úshin 5 jylǵa deıin bas bostandyǵynan aıyrý jazasy qarastyrylǵan.
Buǵan deıin osyndaı jalǵan habarlamalar elimizdiń ózge óńirlerinde de tirkelgen. Atap aıtqanda, Mańǵystaý oblysynda mektepterge shabýyl jasalady degen mazmundaǵy feık aqparat taraǵan bolatyn.