Jelide ózimen shamalas qyzdy aıaýsyz urǵan boıjetkenniń vıdeosy tarady

PAVLODAR. KAZINFORM — Polıtsııa beınejazbadaǵy qyzdardy anyqtady. Olar Pavlodardaǵy kolledjderdiń birinde oqıtyn stýdentter bolyp shyqty.

Áleýmettik jelide bir top qyzdyń arasynda áldebir boıjetkenniń ózimen shamalas qyzdy uryp jyǵyp, aıaýsyz soǵyp jatqany týraly beınejazba tarap ketti. Bólmede otyrǵan ózge qurbylary bolyp jatqan oqıǵany syrttaı baqylap, jábirlengen qyzǵa arasha túspegeni baıqalady. Al kelesi epızodta sotqar qyz jábirlenýshini jerge qulatyp, birneshe soqqy jasaǵanyn kórýge bolady.

Bul vıdeonyń Pavlodarda túsirilgeni anyqtaldy.

«Oqıǵaǵa qatysqandardyń barlyǵy anyqtalyp, polıtsııa bólimshesine jetkizildi. Oqıǵanyń mán-jaıy men sebebi anyqtalyp jatyr», — dep habarlady Pavlodar oblysy polıtsııa departamentiniń baspasóz qyzmetinen.

Al óńirlik bilim berý basqarmasy soqqyǵa jyǵylǵan qyzdyń 2005 jylǵy, uryp-soqqan qyzdyń 2008 jyly týǵanyn habarlady. Sońǵysy jergilikti kolledjdiń ekinshi kýrsynda oqıdy. Jábirlenýshi kámelet jasyna tolǵan. Ol oqıǵaǵa baılanysty polıtsııaǵa aryz túsirmegen, soǵan oraı onyń jeke basyna qatysty derekter aıtylmaı otyr.

Eske sala keteıik, Oral turǵyny qyzyn synyptastary uryp-soqqany jóninde shaǵym jasady.