Áleýmettik jelide kóp qaralym men lúpil jınamaq bolǵan aqtóbelik júrgizýshi qamaldy
AQTÓBE. KAZINFORM – Ol qalanyń bas dańǵylyndaǵy júrginshiler jolynda kóligimen júrgen. Jyldamdyqty asyryp, jol erejesin buzǵan aqtóbelik 10 táýlik ýaqytsha ustaý ızolıatorynda otyrady.
Áleýmettik jelige jarııalanǵan vıdeodan memlekettik nómiri joq Nissan Primera avtokóliginiń júrginshiler jolyndaǵy erkin qozǵalysy kórinedi. Júrgizýshi kóligimen Aqtóbe qalasy Tuńǵysh Prezıdent atyndaǵy saıabaqtan Ǵ. Jubanova kóshesine deıingi aralyqta júrgen.
- Polıtsııa zańǵa baǵynbaı, qoǵamǵa qaýip tóndirgen júrgizýshiniń kim ekenin jedel anyqtady. Aqtóbe qalasynyń turǵyny óziniń áreketin «áleýmettik jelidegi tanymaldylyq úshin» dep túsindirdi. Polıtsııa qyzmetkerleri quqyq buzýshyǵa qatysty ákimshilik zańnamanyń 6 baby boıynsha hattama toltyryldy. Atap aıtqanda, avtokólikti memlekettik nómirsiz basqarý, qaýipsizdik beldigin taqpaý, jol belgileri men manevr jasaý qaǵıdalaryn saqtamaý, jaryq-dybystyq sıgnaldardy zańsyz qoldaný jáne usaq buzaqylyq ta bar. Sot júrgizýshini 10 táýlik ákimshilik qamaqqa alyp, aıyppul salý týraly sheshim shyǵardy. Aıyppuldyń jalpy kólemi 160 myńnan asady,- dedi Aqtóbe oblystyq PD baspasóz qyzmeti.
Ustalǵan júrgizýshi vıdeony TikTok áleýmettik jelisine salyp, qaralym men lúpil, pikir jınamaq bolǵan.
- Mundaı is-áreket osyndaı jaǵdaıǵa ákeledi dep oılamadym. Shyn nıetpen ókinemin. Lúpil, qaralym jınaý úshin boldy,-dedi júrgizýshi.
Eske salsaq, Óskemen qalasynda 59 ret jol erejesin buzǵan sheteldik júrgizýshi toqtatyldy. Tekserý barysynda er adamnyń Qazaqstan Respýblıkasynda turaqty turýǵa ruqsaty bar ekeni anyqtaldy.
