Áleýmettik jelide ımıdj jasaý ońaı, al debat úmitkerlerdiń shynaıy beınesin ashady – Nurdáýlet Zatılla
ASTANA. KAZINFORM – Jibek Joly telearnasynda Quryltaı saılaýyna qatysatyn jeti saıası partııa ókilderiniń qatysýymen bolǵan teledebattan keıin tikeleı efırde «Ashyq stýdııa» saıası tok-shoýy ótip, saıasatker-sarapshylar, zańgerler óz oılaryn ortaǵa saldy.
Solardyń biri - Qazaqstan Respýblıkasy Prezıdenti janyndaǵy Qazaqstan strategııalyq zertteýler ınstıtýtynyń (QSZI) Saıası zertteýler bóliminiń jetekshi sarapshysy Nurdáýlet Zatılla. Sarapshynyń pikirinshe, teledebatqa qatysýshylar óz oılaryn ashyq bildirýge múmkindik aldy.
- Ár partııanyń óz elektoraty, mindeti men maqsatty aýdıtorııasy bar. Osy aýdıtorııa olardyń ókilderimen teledebat arqyly tikeleı baılanys ornatyp, kim unady, soǵan daýys berýge múmkindik aldy. Taqyryp «Zań men tártip boldy», ıaǵnı bizdiń partııalar debatqa shyqqan kezde bıliktiń úshinshi tarmaǵy – sot júıesin jetildirýge kóbirek kóńil bólgenin baıqadyq. Osy baǵytta kim kóbirek jumys atqaryp jatyr nemese óziniń partııalyq platformasynda úshinshi tarmaqty jetildirýge baǵyttalǵan qandaı usynymdardy bere aldy jáne olar osyny debater retinde opponentterinen halyqqa jaqsyraq, qarapaıym tilmen jetkize alsa, sol partııanyń ókilderi kóbirek sımpatııaǵa ıe boldy dep aıtýǵa negiz bar, - deıdi Nurdáýlet Zatılla.
Teledebatta partııalardyń ókilderi birqatar usynysty aıtty. Sarapshynyń pikirinshe, aıtylǵan oılardyń oryndalý múmkindigine nazar aýdarǵan jón.
- Máselen, qandaı da bir partııa áldebir nárseni iske asyramyn dep ýáde berip qoısa jáne keıin ol Quryltaıǵa ótken soń ony istemeı qoısa, ol óziniń elektoratynan aırylyp qalýy múmkin. Qazirgi tańda áleýmettik jelide ımıdjdi qurý óte ońaı. Bir adamdy alady, oǵan qajetti bar jaqsy qasıetterdi berip qoıady. Targetıng qosady. Nátıjesinde halyq ony tek jaqsy jaǵynan ǵana kóre bastaıdy. Al bizdiń qazirgi teledebatymyz osy úmitkerlerdi tikeleı efırge shyǵarý arqyly yńǵaısyz suraqtardy qoıyp jatyr. Olarǵa halyq ózderin tolǵandyratyn suraqtaryn ashyq qoıýǵa múmkindik aldy. Bul – olardyń kásibıligin arttyryp, depýtattyq kezeńge daıyndyqtan ótip jatyr deýge bolady, - dedi Nurdáýlet Zatılla.
Buǵan deıin saıası partııa ókilderiniń komandalyq teledebaty qalaı ótkenin qorytyndylaǵan edik.
