Maman ınternet arqyly tamaqqa tapsyrys bergende neni eskerý kerek ekenin aıtty
ASTANA. KAZINFORM — Astana qalasy sanıtarııalyq-epıdemıologııalyq baqylaý departamenti basshysynyń orynbasary Muqamǵalı Aryspaev tamaqqa tapsyrys berý kezindegi usynymdarmen bólisti.
Qazir ınternet (áleýmettik jeliler) arqyly tamaqqa tapsyrys berý adamdardyń ómirin aıtarlyqtaı jeńildetedi. Degenmen tapsyrys bergen kezde ár tutynýshy eskerý kerek tustary da bar.
Astana qalasy sanıtarııalyq-epıdemıologııalyq baqylaý departamenti basshysynyń orynbasary Muqamǵalı Aryspaevtyń sózinshe, tamaqty úıden isteıtin emes, óndiristik tsehi bar oryndardan tapsyrys berip, alǵan durys.
— «Kúmándi» saıttar arqyly úıde daıyndalǵan aspazdyq, kremdi-kondıterlik ónimderdi jáne konservilengen ónimderdi satyp almańyz. Qoǵamdyq tamaqtandyrý ónimderi daıyndaıtyn statsıonarlyq obektiniń (óndiristik tsehtyń) bar ekendigine kóz jetkizińiz, osy derekterdi 2GIS arqyly tekserińiz. Sonymen qatar pikirlerdi saıtynan nemese 2GIS oqyńyz. Budan bólek jeke tulǵalarǵa tólemderdi aýdarmańyz, kásipkerdiń derektemeleri men satýshynyń mekenjaıy kórsetilgen fıskaldyq túbirtek alatyn-almaıtynyńyzdy tekserińiz, — deıdi Aryspaev.
Departament basshysy atap ótkendeı, tapsyrysty alǵan kezde tamaqtyń qaptamasyn muqııat teksergen jón.
— Qaptamanyń (konteınerlerdiń) tutastyǵy jáne lastanýynyń bolmaýyn, ónimderde kórinetin zaqymdardyń bolmaýyn (sheteldik qosyndylar) tekserińiz. Sondaı-aq árbir oramada mynalardy kórsetetin etıketkanyń bolýy tıis: ydystyń (ónimniń) ataýy, tamaq óniminiń ataýy men óndirisiniń mekenjaıy, daıyndalǵan ýaqyty men kúni, jaramdylyq merzimi men saqtaý sharttary, daıyndaý boıynsha usynystar (qajet bolǵan jaǵdaıda), — dep túsindirdi Muqamǵalı Aryspaev.
Onyń aıtýynsha, ónimniń saqtaý merzimi men saqtaý sharttary týraly málimetterdi de eskergen durys.
— Satyp alǵan taýardyń túbirtegin 5 kún boıy saqtańyz. Ystyq taǵamdardy birden jep, kelesi kúnge qaldyrmaǵan durys. Jeke gıgıena erejelerin saqtańyz. Sonymen qatar tamaqtan ýlaný belgileri paıda bolǵan jaǵdaıda dereý dárigerge júginińiz, — dep keńes berdi maman.
Osyǵan deıin habarlanǵandaı, budan bylaı ulttyq ulan sarbazdaryna ulttyq taǵamdar beriledi.