Áleýmettik jeli arqyly 7,7 mln teńge ıemdengen alaıaq 6 jylǵa sottaldy

ASTANA. KAZINFORM — Astana qalasynyń prokýratýrasy sotta aqparattyq júıelerdi paıdalana otyryp birneshe ret alaıaqtyq jasaǵan turǵynǵa úkim shyǵardy. Bul týraly prokýratýranyń baspasóz qyzmeti málim etti. 

— Kináli tulǵa Instagram áleýmettik jelisinde, tıimdi ınvestıtsııalar, arzan týrıstik joldamalar jáne shetelde jumysqa ornalastyrý týraly jalǵan jarnamalyq habarlandyrýlar ornalastyrǵan. Azamattardy jańylystyryp jáne olardyń senimin teris paıdalana otyryp, ol jábirlenýshilerden aqshalaı qarajat alyp, olardy óz múddesine jumsap, ózine alǵan mindettemelerin oryndamaǵan, — delingen habarlamada. 

Qylmystyq áreketterdiń nátıjesinde 10 adam zardap shegip, olarǵa 7,7 mln teńgeden astam somada materıaldyq zalal keltirilgen. Sot talqylaýy barysynda memlekettik aıyptaýshy qaǵıdatty ári dáıekti ustanym tanytyp, sotqa sottalýshynyń kinásin dáleldeıtin jetkilikti aıǵaqtardy usyndy jáne bas bostandyǵynan aıyrý túrindegi naqty jaza taǵaıyndaý qajettigin negizdedi.

Sot úkimimen kináli azamatsha 6 jylǵa bas bostandyǵynan aıyryldy. Jábirlenýshilerdiń azamattyq talap aryzdary qanaǵattandyryldy. Úkim zańdy kúshine endi.

Astana qalasynyń prokýratýrasy áleýmettik jeliler men messendjerlerdi paıdalaný kezinde asa saq bolýǵa, ınternettegi jeńil tabys, arzan týrlar men ınvestıtsııalar týraly usynystarǵa senbeýge, áleýmettik jeliler arqyly qyzmet usynatyn tulǵalardy muqııat tekserýge jáne alaıaqtyq faktileri anyqtalǵan jaǵdaıda dereý quqyq qorǵaý organdaryna júginýge shaqyrady.