Áleýmettik jáne ınfraqurylymdyq jobalarǵa 6,5 trln teńge bólinedi
ASTANA. KAZINFORM — Búgin Úkimet otyrysynda Premer-mınıstrdiń orynbasary — Ulttyq ekonomıka mınıstri Serik Jumanǵarın Prezıdent Joldaýyn iske asyrý aıasynda ınfraqurylymǵa qansha qarajat bólinetinin aıtty.
Onyń aıtýynsha, Prezıdenttiń Qazaqstan halqyna Joldaýyn iske asyrý jónindegi jalpyulttyq is-sharalar jospary 12 baǵyt boıynsha 96 (onyń ishinde 80 Úkimettik) is-sharadan turady.
— Infraqurylymdyq jańǵyrý baǵyty aıasynda «Halyqtyq qurylys» damý jospary bekitiledi. Sonymen qatar, 2027 jyl Halyqtyq aýqymdy qurylys jyly dep jarııalanady. Negizgi áleýmettik jáne ınfraqurylymdyq jobalardy iske asyrý úshin Ulttyq qordan shamamen 6,5 trln teńge bólinedi. Qalalyq ortany jańartýdyń júıeli negizi retinde iri qalalardy uzaq merzimdi damytýdy eskýrbanıere otyryp, qala qurylysy qujattaryn ázirleý (ýrbanıstıka), sondaı-aq olardyń tsıfrlyq syńaryn jasaý iske asyrylady, — dedi Serik Jumanǵarın.
Onyń aıtýynsha, Jalpyulttyq jospar aıasynda sonymen qatar, turǵyn úı-kommýnaldyq sharýashylyǵyn jańǵyrtýdy qarjylandyrý, turǵyn úı qurylysyn jalǵastyrý, eldi mekenderdi aýyz sýmen jáne gazben qamtamasyz etý qarastyrylǵan.
Buǵan deıin habarlanǵandaı, búgin Úkimet otyrysynda Memleket basshysynyń bıylǵy 28 qazandaǵy «Jańa tarıhı kezeńdegi Qazaqstannyń ózekti mindetteri» atty Qazaqstan halqyna Joldaýyn iske asyrý jónindegi jalpyulttyq is-sharalar josparynyń» jobasy maquldanyp, tıisti qaýly qabyldandy.
