Áleýmettik tólemnen nege bas tartylady: negizgi sebepter ataldy
ASTANA. KAZINFORM — 2026 jyldyń jeti aıynda Qazaqstanda áleýmettik tólem taǵaıyndaýdan bas tartý týraly 98 myńnan astam sheshim qabyldanǵan. Kóbine jumysynan aıyrylýyna baılanysty tólem alýǵa ótinish bergen azamattarǵa bas tartylǵan.
Memlekettik áleýmettik saqtandyrý qorynda qazaqstandyqtardyń qandaı jaǵdaıda tólemnen qaǵylýy múmkin ekenin jáne mundaı jaǵdaıda ne isteý kerektigin túsindirdi
Sebepteri ártúrli
Memlekettik áleýmettik saqtandyrý qorynan bes áleýmettik táýekel boıynsha tólem beriledi. Olar — eńbekke qabilettilikten aıyrylý, asyraýshysynan nemese jumysynan aıyrylý, júktilik pen bosanýǵa baılanysty tabystan aıyrylý, sondaı-aq bala bir jarym jasqa tolǵanǵa deıin onyń kútimine baılanysty tabystan aıyrylý.
Alaıda tólem alýǵa ótinish berý onyń mindetti túrde taǵaıyndalatynyn bildirmeıdi. Qor tólem taǵaıyndaýdan bas tartýdyń negizgi sebepterin atady.
Olardyń qatarynda tólem alýǵa quqyǵynyń bolmaýy, qujattar toptamasynyń tolyq bolmaýy, usynylǵan málimetterdegi qateler nemese sáıkessizdikter, sondaı-aq jalǵan aqparat berý bar. Qor qosymsha suratqan qujattardy usynbaǵan jaǵdaıda da tólem taǵaıyndaýdan bas tartylýy múmkin.
Jıi kezdesetin sebepterdiń biri — áleýmettik aýdarymdar somasynyń ótinishte kórsetilgen tabysqa sáıkes kelmeýi. Sondaı-aq memlekettik aqparattyq júıelerdegi málimetterdiń sáıkes kelmeýinen de qıyndyqtar týyndaýy múmkin.
2026 jylǵy qańtar-shilde aralyǵynda Qor fılıaldary áleýmettik tólem taǵaıyndaýdan bas tartý týraly 98 081 sheshim shyǵarǵan.
Eń kóp bas tartý jumysynan aıyrylýyna baılanysty tólemder boıynsha — 44 549 boldy. Taǵy 27 983 sheshim bala bir jarym jasqa tolǵanǵa deıingi kútimge baılanysty tólemderge, al 20 969 sheshim júktilik pen bosanýǵa baılanysty tólemderge qatysty qabyldanǵan.
Bul rette azamatqa tólem taǵaıyndaýdan bas tartýdyń naqty sebebi habarlanýy tıis.
Tólem taǵaıyndaýdan bas tartylsa, ne isteý kerek?
Qabyldanǵan sheshimge shaǵymdanýǵa bolady. Shaǵymdy Memlekettik áleýmettik saqtandyrý qorynyń tıisti fılıalynyń basshysyna, tikeleı Qorǵa nemese joǵary turǵan ýákiletti organǵa berýge bolady. Eger ótinish berýshi shaǵymdy qaraý nátıjesimen kelispese, sotqa júginýge quqyly.
Bul rette bas tartý tólemdi endi alý múmkin emes degendi bildirmeıdi. Eger bas tartýǵa sebep bolǵan jaǵdaı joıylsa, mysaly, jetispeıtin qujattar usynylsa nemese málimetter túzetilse, azamat tólem alý úshin qaıta ótinish bere alady.
Belgilengen merzimderdi ótkizip almaý mańyzdy. Júktilik pen bosanýǵa baılanysty tólemdi alý úshin quqyq paıda bolǵan kúnnen bastap 12 aıdan keshiktirmeı, bala kútimine baılanysty tólem úshin 18 aıdan keshiktirmeı, al jumysynan aıyrylýyna baılanysty tólem úshin 12 aı ishinde ótinish berý qajet.
Buǵan deıin tamyz aıynan bastap ákimdikter kórsetetin birqatar memlekettik qoldaý sharalary jasandy ıntellekt kómegimen taǵaıyndala bastaıtynyn jazǵan bolatynbyz.
