Áleýmettik tólemderdiń ýaqtyly berilýi men durys taǵaıyndalýy tekseriledi – mınıstrlik
ASTANA. KAZINFORM – Keler jyldan bastap elimizde áleýmettik qyzmet kórsetetin uıymdardyń jumysy baǵalanady jáne áleýmettik tólemderdiń ýaqtyly berilýi men durys taǵaıyndaý barysyna tekserý júrgiziledi.
- Bıyl tamyzda táýekel dárejesin baǵalaý krıterııleri men áleýmettik qamsyzdandyrý, onyń ishinde mindetti áleýmettik saqtandyrý salasyndaǵy tekserý paraǵy bekitildi. Atalǵan baǵyttar boıynsha 2025 jyly tekserý jumystary bastalady, - dedi Eńbek jáne halyqty áleýmettik qorǵaý mınıstrligi áleýmettik qorǵaý salasyndaǵy retteý jáne baqylaý komıtetiniń tóraǵasy Tólegen Ospanqulov ortalyq kommýnıkatsııalar qyzmeti alańynda ótken baspasóz máslıhatynda.
Osylaısha, keler jyldan bastap áleýmettik tólemder júrgizýdiń barysy tekseriledi.
- Azamattardyń áleýmettik tólemderdi ýaqytyly alýy, onyń durys taǵaıyndalýy men aýdarý sııaqty qyzmetterdiń oryndalý barysyna tekserý júredi. Baqylaý sýbektileri qataryna «Azamattarǵa arnalǵan úkimet» memlekettik korporatsııasy, «Memlekettik áleýmettik saqtandyrý qory» AQ, sondaı-aq olardyń fılıaldary kiredi. Atalǵan uıymdardyń qyzmeti 12 krıterıı boıynsha baǵalanady, – deıdi spıker.
Aıta keteıik, 2025 jyldan bastap Qazaqstanda arnaıy áleýmettik qyzmet kórsetetin uıymdardan lıtsenzııa talap etiledi.
Sondaı-aq eńbek mınıstrliginiń ókili múgedek jandardyń qoǵamdyq orynda jıi tap bolatyn kedergilerdi atady.