Áleýmettik tólemder kólemi bıyl ósedi me
ASTANA. KAZINFORM – Búgin Eńbek jáne halyqty áleýmettik qorǵaý mınıstrliginiń alqa májilisi ótti. Onda vedomstvo basshysy Asqarbek Ertaev 2025 jyly áleýmettik tólemderge 5,9 trln teńge baǵyttalǵanyn málim etti. Atalǵan kórsetkish respýblıkalyq bıýdjettiń barlyq shyǵystarynyń 23%-yn qurap otyr.
- Jyl saıynǵy ındeksteý aıasynda bizdiń 4,6 mln azamatymyz úshin zeınetaqylar men járdemaqylar artty, bul olardyń satyp alý qabiletin senimdi qorǵaýǵa múmkindik berdi. 2025 jyly yntymaqty zeınetaqy 8,5%-ǵa ósti, al bazalyq zeınetaqy 6,5%-ǵa ındeksteldi. 2026 jyly tólemderdiń josparly ósý saıasaty jalǵasady: bazalyq zeınetaqynyń eń joǵary mólsheri eń tómengi kúnkóris deńgeıiniń 118%-yna deıin ulǵaıtyldy, zeınetaqylar men járdemaqylardy jyl saıynǵy ındeksteý 10%-dy qurady, al mınıstrliktiń josparlanǵan shyǵystarynyń jalpy kólemi 6,9 trln teńgege deıin ósti, – dedi mınıstr.
Otyrys barysynda vedomstvo jumysynyń áleýmettik tólemderden basqa da negizgi baǵyttary boıynsha jańa tásilder belgilendi. Kóshi-qon saıasaty salasynda joǵary bilikti sheteldik mamandardy tartýǵa basymdyq bere otyryp, tsıfrlyq skorıng júıesi engizilip jatyr. Inklıýzııa salasynda syrttaı múgedektikti belgileý protsesterin tolyq tsıfrlandyra otyryp, áleýmettik-quqyq qorǵaý modeline kóshý júzege asyrylady.
Jıyn barysynda ózderiniń salalyq baǵyttary boıynsha egjeı-tegjeıli baıandamalarmen: Eńbek jáne halyqty áleýmettik qorǵaý vıtse-mınıstri Vıktorııa Shegaı, «Eńbek resýrstaryn damytý ortalyǵy» AQ prezıdenti Erasyl Jumanbaev, Memlekettik eńbek ınspektsııasy komıtetiniń tóraǵasy Meırambek Ahmetov jáne «MÁSQ» AQ prezıdenti Almas Qurmanov sóz sóıledi.
Aıta keteıik, alqa otyrysynda qatysýshylar 2025 jylǵy memlekettik saıasatty iske asyrý qorytyndylaryn shyǵaryp, áleýmettik-eńbek salasyn damytýdyń 2026 jylǵa arnalǵan negizgi vektorlaryn aıqyndady.
Osyǵan deıin Eńbek mınıstri 2026 jyly 547,7 myń adamdy jumysqa ornalastyrýdy josparlap otyrǵanyn jetkizdi.