Áleýmettik tólemder bank qosymshalary arqyly avtomatty túrde ustala ma — Salyq kodeksine qandaı ózgerister enedi
ASTANA. KAZINFORM — Ulttyq ekonomıka mınıstrligi «QR Salyq kodeksine ózgerister men tolyqtyrýlar engizý týraly» QR Zańynyń jobasyn qoǵamdyq talqylaý úshin «Ashyq NQA» portalyna shyǵardy.
Ózgerister kásipkerlerdiń, ózin-ózi jumyspen qamtyǵandar men azamattardyń, bankter, tólem uıymdary jáne marketpleısterdiń, sondaı-aq, ınvestorlardyń qyzmetin qamtıdy.
Bıznes úshin:
• taýarlardy mindetti tańbalaýǵa jumsalǵan shyǵyndardy joǵarylatýshy koeffıtsıentpen esepke alý usynylady;
• ekinshi deńgeıdegi bankterdiń faktorıng jáne forfeıtıng operatsııalaryn QQS-tan bosatý múmkindigi qarastyrylady;
• JK qyzmetin toqtatý bólek ótinish bermeı, taratýǵa baılanysty salyq eseptiligin tapsyrý arqyly rásimdeledi;
• eleýli ári uzaq merzimdi salyq bereshegi bolǵan jaǵdaıda EShF jazyp berý tártibi ózgeredi;
• ınvestıtsııalyq salyqtyq preferentsııalardy qoldaný múmkindikteri keńeıedi;
• rezıdent emes tulǵalarmen jasalatyn operatsııalarǵa salyq salý erejeleri naqtylanady.
Ózin-ózi jumyspen qamtyǵandar men azamattar úshin:
• ózin-ózi jumyspen qamtyǵandardyń áleýmettik tólemderin bank qosymshalary arqyly avtomatty túrde ustap, aýdarý usynylady;
• ózin-ózi jumyspen qamtyǵandarǵa arnalǵan arnaıy salyq rejımin qoldana alatyn tulǵalar aıasy naqtylanady;
• áleýmettik salyq shegerimderin qoldaný jeńildetiledi;
• memlekettik bajdy qaıtarýdy proaktıvti formatqa kóshirý josparlanyp otyr.
Bankter, tólem uıymdary jáne marketpleıster úshin:
• memlekettik kirister organdaryna derekter berý boıynsha mindetter keńeıedi;
• bankter men qarjylyq ınfraqurylymnyń basqa da qatysýshylaryna salyq agentteriniń qosymsha fýnktsııalary júkteledi;
• qazaqstandyq marketpleıster sheteldik satýshylarmen jasalatyn operatsııalar boıynsha salyq agenti qyzmetin atqarýy tıis bolady;
• ınternet-platformalarǵa salyqtyq baqylaýdyń jańa tetikteri engiziledi.
Investorlar úshin:
• jekelegen ınvestıtsııalyq preferentsııalardy qaıta engizý usynylady;
• belgilengen jaǵdaılarda ınfraqurylym nysandaryn qurýǵa jumsalǵan shyǵyndardy shegerimge jatqyzýǵa bolady;
• «Altyn vıza» ıelerine arnalǵan arnaıy erejeler engiziledi;
• ınvestıtsııalyq jobalardy salyqtyq qoldaý tetikteri keńeıtiledi.
Usynylyp otyrǵan túzetýler tek salyq mólsherlemeleri men jeńildikterin ózgertýmen shektelmeıdi. Salyqtyq ákimshilendirýdiń jekelegen bıznes úderisteri de qaıta qaralady. Atap aıtqanda, keıbir mindetter bankterge, tólem uıymdaryna jáne marketpleısterge júkteledi. Sonymen birge, birqatar rásim proaktıvti formatqa kóshiriledi. Al salyq tóleýshiler men memleket arasyndaǵy ózara is-qımyl tsıfrlandyrylady.
Qujat «Ashyq NQA» portalynda 25 qyrkúıekke deıin qoǵamdyq talqylaýda bolmaq.
Jobanyń tolyq mátinin myna siltemeden oqýǵa bolady.
Eske salaıyq, buǵan deıin QR Ulttyq ekonomıka mınıstrliginiń baspasóz qyzmeti Qazaqstanda ózin-ózi jumyspen qamtyǵandar úshin jeke salyq qarastyrylmaıtynyn habarlaǵan bolatyn.
— Al búgingi tańda ózin-ózi jumyspen qamtyǵandar úshin JTS engizý boıynsha eshqandaı sheshim qabyldanǵan joq. Bul aldaǵy kezeńniń de kún tártibinde turǵan másele emes. Jańa Salyq kodeksiniń sheńberinde ózin-ózi jumyspen qamtyǵandar úshin tek áleýmettik tólem tóleý kózdelgen, barlyǵy 4% (tabys aıyna 300 AEK-ten aspaıtyn jaǵdaıda, qyzmet jaldamaly jumyskerlerdi tartpaı júrgiziledi jáne ruqsat etilgen tizbege kiredi), — delingen habarlamada.
Eske salsaq, ózin-ózi jumyspen qamtyǵandardyń quqyqtyq mártebesi máselesi bıylǵy 21 shildede Premer-mınıstrdiń orynbasary — Ulttyq ekonomıka mınıstri Serik Jumanǵarınniń tóraǵalyǵymen ótkizilgen jobalyq keńseniń otyrysynda qaralǵan bolatyn. Onyń qorytyndysynda Áleýmettik jáne Kásipkerlik kodeksterge ózgeristerdi aǵymdaǵy túzetýler paketine qospaý týraly sheshim qabyldandy.
Mınıstrliktiń málimetinshe, bul máseleni qaraýǵa jańa rejımdi qoldanýda jetkilikti tájirıbe jınaqtalyp, onyń jumys nátıjesi taldaǵannan keıin, kelesi jyly oralý josparlanyp otyr.
Aıta keteıik, buǵan deıin Qazaqstanda muraǵa qalǵan dúnıe-múlik úshin kimder 20% salyq tóleıtinin jazǵanbyz.
