Áleýmettik tólem qandaı jaǵdaıda keri qaıtarylady

Qazaqstanda mindetti áleýmettik saqtandyrý júıesi jumys isteıdi. Onyń maqsaty jumys isteıtin azamattarǵa zańda kórsetilgen áleýmettik jaǵdaılar týyndaǵan kezde qarjylaı qoldaý kórsetý. Jumys berýshiler qyzmetkerleri úshin Memlekettik áleýmettik saqtandyrý qoryna áleýmettik aýdarymdar tóleıdi. Al áleýmettik táýekel týyndaǵan jaǵdaıda, júıege qatysýshy azamat zańda belgilengen talaptarǵa saı bolsa, áleýmettik tólem alýǵa quqyly.

Áleýmettik tólemder Qazaqstan Respýblıkasynyń Áleýmettik kodeksine sáıkes taǵaıyndalady. Ony alý úshin deldal izdep, bireýge aqsha tóleýdiń qajeti joq.

2026 jyldyń qańtar–tamyz aılarynda áleýmettik tólemdi 1 mln 64 myń adam alǵan. Olarǵa jalpy 527 mlrd teńgege jýyq qarajat tólendi.

— Mindetti áleýmettik saqtandyrý júıesi áleýmettik táýekeldiń alty túri boıynsha tólem qarastyrady. Olar — eńbekke qabilettilikten aıyrylý, asyraýshysynan aıyrylý, jumystan aıyrylý, júktilik pen bosanýǵa baılanysty tabystan aıyrylý, jańa týǵan balany nemese balalardy asyrap alýǵa baılanysty tabystan aıyrylý, sondaı-aq bala bir jarym jasqa tolǵanǵa deıin onyń kútimine baılanysty tabystan aıyrylý. Ár tólemniń óz talaptary bar, — delingen habarlamada.

Áleýmettik jelilerde azamattarǵa áleýmettik tólemdi rásimdep berý, ony uzartý nemese jumysynan aıyrylǵany úshin tólem alyp berý týraly usynystar kezdesýi múmkin. Mundaı aqparatqa birden senbeı, aldymen onyń durystyǵyn teksergen jón. Eńbek jáne halyqty áleýmettik qorǵaý mınıstrligi áleýmettik tólemderge qatysty aqparatty resmı memlekettik resýrstardan alýǵa keńes beredi.

Áleýmettik tólem taǵaıyndalǵan kezde Memlekettik áleýmettik saqtandyrý qory usynylǵan málimetterdi zań talaptaryna sáıkes tekseredi. Sondyqtan tólem rásimdeý kezinde shynaıy aqparat pen durys qujat usyný mańyzdy. Bul tólemniń zań talaptaryna saı taǵaıyndalýyn qamtamasyz etip, mindetti áleýmettik saqtandyrý júıesiniń qarajatyn qorǵaýǵa múmkindik beredi.

Sondyqtan tólem rásimdeý kezinde shynaıy aqparat pen durys qujat usyný mańyzdy. Mysaly, jalǵan jumysqa ornalastyrýdy rásimdeý nemese tólem alý úshin shyndyqqa sáıkes kelmeıtin málimet berýge kelispegen jón. Eger áleýmettik tólem zańsyz alynǵany anyqtalsa, qarajat zańda belgilengen tártippen qaıtarylýy múmkin. Al ádeıi jalǵan málimet berý zań boıynsha jaýapkershilikke ákelýi yqtımal.

— 2025 jyly elimizdiń 12 óńirinde áleýmettik tólemderdi zańsyz alýǵa qatysty 30-dan astam qylmystyq is qozǵalǵan. Bes óńirde sot 7 úkim shyǵarǵan. Tergeý barysynda azamattardy áleýmettik jelilerdegi habarlandyrýlar men usynystar arqyly zańsyz tólem alý shemalaryna tartý faktileri anyqtalǵan, — delingen mınıstrlik habarlamasynda.

Jeke jáne qarjylyq derekterdiń qaýipsizdigine erekshe nazar aýdarý qajet. Áleýmettik tólemderdi rásimdeý kezinde azamattar jeke kýálik derekterin, bank kartasynyń málimetterin, bankke qatysty qupııa aqparatty, SMS arqyly kelgen kodtardy, ETsQ-ǵa qatysty málimetterdi jáne ózge de jeke derekterdi bógde adamdarǵa bermeýi kerek.

Sondaı-aq «tólemdi mindetti túrde rásimdep beremin», «tólemdi tezdetip alamyn» nemese «tólem merzimin uzartyp beremin» dep qyzmet usynatyn adamdarǵa aqsha tóleýdiń qajeti joq. Áleýmettik tólemder zańnamada belgilengen tártippen taǵaıyndalady. Sondyqtan tólem taǵaıyndaý týraly sheshim zańda kórsetilgen talaptar men usynylǵan málimetter negizinde qabyldanady.

— Áleýmettik tólemderdi taǵaıyndaý sharttary men tártibi týraly ózekti aqparatty Qazaqstan Respýblıkasy Eńbek jáne halyqty áleýmettik qorǵaý mınıstrliginiń, Memlekettik áleýmettik saqtandyrý qorynyń resmı resýrstarynan, sondaı-aq egov.kz elektrondyq úkimet portalynan alýǵa bolady. Qosymsha suraqtar boıynsha 1414 Biryńǵaı baılanys ortalyǵyna habarlasýǵa bolady, — delingen habarlamada.

Aıta ketelik Qazaqstanda keı járdemaqylar úsh jylda bir ret kóteriletini týraly jazǵan edik.