Áleýmettik taýarlar baǵasynyń ósý qarqyny 4 ese baıaýlady
ASTANA. KAZINFORM — Memlekettik baqylaý baǵytynda Atyraý jáne Soltústik Qazaqstan oblystarynyń jumysy synǵa alyndy. Ásirese, Atyraý oblysynda jarty jyl ishinde 12 zań buzý deregi anyqtalǵan, bul baqylaý jumysynyń jetkiliksizdigin kórsetedi. Sonymen qatar Abaı, Aqtóbe, Qaraǵandy, Jambyl, Túrkistan oblystary men Astana qalasynda jyl basynan beri birde-bir tıimsiz deldal naryqtan shettetilmegen.
Saýda jáne ıntegratsııa mınıstrligi Saýda komıtetiniń alqa májilisinde 2026 jyldyń birinshi jartyjyldyǵy qorytyndylandy. Jıyn barysynda áleýmettik mańyzy bar azyq-túlik taýarlarynyń baǵasyn turaqtandyrý sharalary men óńirlik departamentterdiń jumys tıimdiligi talqylandy.
Júrgizilgen júıeli jumystardyń nátıjesinde elimizde áleýmettik mańyzy bar taýarlardyń baǵasynyń ósý qarqyny ótken kezeńmen salystyrǵanda tórt esege jýyq baıaýlaǵan.
Bul kórsetkishke memlekettik baqylaýdy kúsheıtý, taýarlar tizbesin keńeıtý jáne otandyq óndirýshilerdi qoldaý sharalary arqyly qol jetkizildi.
Barlyǵy 3 907 ákimshilik is tirkeldi, onyń ishinde 2 391-i ruqsat etilgen saýda ústemesin asyrýǵa qatysty bolsa, óńirlik komıssııalardyń jumysy arqyly 2 322 zań buzý anyqtalyp, jetkizý tizbeginen 164 tıimsiz deldal shettetildi.
Sonymen qatar, baqylaý sharalary aıasynda zańsyz ákelingen 46,5 myńnan astam jumyrtqa tárkilenip, tsıfrlyq azyq-túlik vaýcherleri men 31 taýar pozıtsııasyna baǵa monıtorıngi engizildi. Sondaı-aq, apta saıyn 132 aýyl sharýashylyǵy jármeńkesi uıymdastyrylyp, 25 saýda bazaryn jańǵyrtý jumystary men aqparatty ýaqytyly usyný boıynsha atqarýshylyq tártipti nyǵaıtý sharalary erekshe baqylaýǵa alyndy.
Alaıda maýsym aıynyń qorytyndysy boıynsha keıbir óńirlerde baǵany baqylaý jumystarynyń álsiregeni baıqalady.
Memlekettik baqylaý baǵytynda Atyraý jáne Soltústik Qazaqstan oblystarynyń jumysy synǵa alyndy. Ásirese, Atyraý oblysynda jarty jyl ishinde 12 zań buzý deregi anyqtalǵan, bul baqylaý jumysynyń jetkiliksizdigin kórsetedi. Sonymen qatar Abaı, Aqtóbe, Qaraǵandy, Jambyl, Túrkistan oblystary men Astana qalasynda jyl basynan beri birde-bir tıimsiz deldal naryqtan shettetilmegen.
— Esep úshin ótkiziletin jıyndardyń bizge qajeti joq. Naqty nátıje kerek — zań buzýdy anyqtaý, tıimsiz deldaldardy naryqtan shyǵarý jáne baǵanyń negizsiz ósýine jol bermeý basty mindet bolyp qala beredi, — dedi saýda komıtetiniń tóraǵasy Ernur Jaýtykbaev baqylaý jumystarynyń sapasyna qatysty qatań talap qoıdy.
Alqa májilisiniń qorytyndysy boıynsha 2026 jyldyń sońyna deıin saýda bazarlaryn jańǵyrtý jumystaryn aıaqtaý tapsyryldy. Ekinshi jartyjyldyqtaǵy negizgi basymdyqtar — baǵa turaqtylyǵyn saqtaý, «úı janyndaǵy» shaǵyn jármeńkelerdi damytý jáne tsıfrlyq azyq-túlik vaýcherleri jobasyn iske asyrý bolmaq.
Aıta ketelik Qazaqstandyq qandaı taýarlar sheteldik balamalarynan arzanyraq ekenin jazǵan edik.
