Áleýmettik taýarlar baǵasyn negizsiz kótergenderge 50 mln teńge aıyppul salyndy

ASTANA. KAZINFORM – QR Saýda jáne ıntegratsııa mınıstrligi saýda salasyndaǵy zań buzýshylyqtardyń aldyn alý jáne áleýmettik mańyzy bar azyq-túlik taýarlary baǵasynyń ósýin tejeý baǵytynda júıeli jumysty jalǵastyrýda.

Eldiń barlyq óńirinde turaqty negizde jumys isteıtin óńirlik komıssııalar deldaldyq tizbekterdi zerdelep, baǵa qalyptastyrý úderisin keshendi túrde taldaıdy. Mundaı tásil tıimsiz deldaldardy jáne taýar baǵasynyń negizsiz qymbattaý faktilerin der kezinde anyqtaýǵa múmkindik beredi.

- Jyl basynan beri jergilikti atqarýshy organdar óńirlik komıssııalardyń 960 otyrysyn ótkizdi. Nátıjesinde 2727 tıimsiz deldal jáne saýda ústemesin zańsyz kóterý faktileri anyqtaldy. 2342 jaǵdaı boıynsha ákimshilik quqyq buzýshylyq týraly hattamalar toltyrylyp, 385 deldal jetkizý tizbeginen shyǵaryldy. Komıssııalar jumysynyń tıimdiligi QMA, BQDA, MKD jáne basqa da memlekettik organdar ókilderiniń qatysýy esebinen artty. Otyrystarǵa óndirýshiler men kásipkerler shaqyrylyp, qoldanystaǵy zańnama talaptary, sonyń ishinde saýda ústemesiniń shekti mólsheri túsindiriledi, - dep jazdy vedomstvodan.

Sonymen qatar áleýmettik mańyzy bar taýarlardyń qozǵalysyn baqylaýǵa baǵyttalǵan pılottyq jobanyń aıasynda elektrondyq shot-faktýralardy birlesip taldaý júrgizilýde. Bul qural baǵanyń negizsiz ósýine jáne artyq deldaldyq býyndardyń paıda bolýyna jol beretin táýekelderdi jedel anyqtaýǵa múmkindik beredi. Jyl basynan beri 10 mıllıonnan astam jetkizý tizbegi taldanyp, saýda zańnamasyn buzý qaýpiniń 914 belgisi anyqtaldy.

- Júrgizilgen taldaý men komıssııalardyń jumysy nátıjesinde aýmaqtyq departamentter ÁQBtK-niń 204-4-baby boıynsha saýda ústemesin 15 paıyzdan joǵary qoldanǵany úshin 2438 ákimshilik qaýly qabyldady. Onyń ishinde 1267 aıyppuldyń jalpy somasy 50,8 mıllıon teńgeden asty, sondaı-aq 1171 eskertý berildi. Elektrondyq shot-faktýralardy taldaý áleýmettik mańyzy bar taýarlarǵa baǵany negizsiz kóterýdiń naqty jaǵdaılaryn anyqtaýǵa múmkindik berdi, - delingen aqparatta.

Máselen, Batys Qazaqstan oblysynda «Juldyz» jeke kásipkerligi «Iletskaıa» tuzynyń kılogramyn 55 teńgeden satyp alyp, 90 teńgeden satqan. Saýda ústemesi 63,6 paıyzdy qurady. Ulytaý oblysynda jeke kásipker Baıkenjınova Z.M. «Eurasian Foods Corporation» AQ-nan «Shedevr» kúnbaǵys maıyn (1 l) satyp alyp, 1100 teńgeden satqan, saýda ústemesi 22,22 paıyzǵa jetken. Qostanaı oblysynda jeke kásipker Kaşenko I.L. pııazdy satyp alyp, kılogramyn 150 teńgeden satqan, saýda ústemesi 50 paıyzdy quraǵan.

Atalǵan faktiler boıynsha kásipkerlerge QR Ákimshilik quqyq buzýshylyq týraly kodeksiniń 204-4-babyna sáıkes ákimshilik sharalar qoldanyldy.

Aıta keteıik, Úkimet azyq-túlik baǵasyna baqylaýdy kúsheıtedi.