Áleýmettik taýar baǵasyna qoldanylatyn 15 paıyzdyq ústeme shekteýi ulǵaıtylady

ASTANA. KAZINFORM – Saýda jáne ıntegratsııa mınıstri Arman Shaqqalıev Májilis depýtatynyń saýalyna joldaǵan jaýapta áleýmettik tizimge engen taýarlardyń baǵasyna belgilengen 15 paıyzdyq ústemeniń shegin kóterý máselesi pysyqtalyp jatqanyn málim etti.

- 15% saýda ústemesine keletin bolsaq, mundaı retteý taýarlardyń shekteýli aýqymyna ǵana áser etetinin, al assortımenttiń negizgi bóligi erkin baǵa belgileý jaǵdaıynda satyla beretinin atap ótemiz.

Sonymen qatar qazir mınıstrlik bıznes usynystaryn eskere otyryp, ÁMAT-qa saýda ústemesin qalyptastyrý tásilin qaıta qaraý týraly máseleni qarastyryp jatyr. Shyǵyndardy eskere otyryp, ústemeaqyny ulǵaıtý múmkindigin kózdeıtin túzetýler ázirlenýde. Osy túzetýlerdi qabyldaý 2026 jyly josparlanyp otyr, - dep jazylǵan jaýapta.

Mınıstr jaýabynda áleýmettik mańyzy bar taýarlar tizbesi 2026 jyldyń basynan beri 31-ge keńeıtilgenin eske salady.

- ÁMAT-tyń pysyqtalǵan tizbesinde 31 ataý bar (onyń ishinde qyzanaq («cherrı», «júzim tektes» sorttarynan basqa), qııar («qyshqyl» sortynan basqa), alma, sıyr eti, qoı eti, jylqy eti, tartylǵan et, jańa pisken, salqyndatylǵan jáne muzdatylǵan (qaraquıryq, móńke, kókserke, tuqy, sazan) balyq, taýyq eti (ushalar), pasterlengen, ýltra pasterlengen, dámi joq maılylyǵy 2,2%-dan 6%-ǵa deıin sterıldengen sút (laktozasyz qospaǵanda), maılylyǵy 2-3% aıran (laktozasyz qospaǵanda), qaımaq (laktozasyz qospaǵanda), súzbe: maılylyǵy 5-9% (laktozasyz qospaǵanda), maılylyǵy 40-50% qatty, jartylaı qatty irimshik, qara shaı (qaptalǵannan basqa dámsiz), - deıdi Arman Shaqqalıev.

Buǵan deıin áleýmettik mańyzy bar taýarlardyń tizbesi 33-ke jetetini aıtylǵan bolatyn.