Áleýmettik sala baǵytynda onlaın oqytý júıesi engiziledi - Úkimet
ASTANA. KAZINFORM – Byltyr eńbekke qabiletti 413,7 myń múgedektigi bar adamnyń 30% jumyspen qamtylǵan. Bul týraly Úkimet otyrysynda ınklıýzıvti saıasatty júzege asyrý sharalaryn talqylaý kezinde Eńbek jáne halyqty áleýmettik qorǵaý mınıstri Asqarbek Ertaev málim etti.
- Áleýmettik qyzmetkerler biliktiligin arttyrýǵa erekshe kóńil bólingen. Búginde salada shamamen 12 myń áleýmettik qyzmetker jumys isteıdi. Áleýmettik qyzmetkerdi esepke alýdyń biryńǵaı tizilimi quryldy. Biliktilikti taný júıesi qosyldy, odan 2 447 maman ótti. 8 kásiptik standart bekitildi. Kadrdyń biliktiligin kezeń-kezeńimen arttyrýǵa múmkindik beretin 6 arnaıy oqytý modýlderi ázirlendi. Bıyl attestatsııadan ótken áleýmettik qyzmetkerler sanyn 5 myńǵa deıin jetkizemiz. Elimizdiń jetekshi joǵary oqý oryndarymen birlesip bilim berý baǵdarlamalary jańartylady. Áleýmettik sala baǵyty boıynsha onlaın-oqytý júıesin engizý josparlanǵan, - dedi A.Ertaev.
Onyń aıtýynsha, ınklıýzıvti jumyspen qamtýdy damytý basty basymdyq bolady. Byltyr eńbekke qabiletti 413,7 myń múgedektigi bar adamnyń 110,8 myńy (30%) jumyspen qamtylǵan. Jumyspen qamtýdyń belsendi sharalarymen 25 myńnan astam múgedektigi bar adam qamtylǵan. Jumys oryndaryn kvotalaý aıasynda 8 myńnan asa adam jumysqa ornalasqan.
- Jumyspen qamtylǵannyń basym bóligi Ulytaý, Qaraǵandy oblystarynda jáne Astana qalasynda baıqaldy. Jumyspen qamtylǵandar úlesiniń tómen kórsetkishin Túrkistan, Jambyl jáne Abaı oblystarynda kórýge bolady, - dedi mınıstr.
Budan buryn habarlanǵandaı, bıyl ınklıýzıvti jumyspen qamtý múmkindigi keńeıtiledi.
