Áleýmettik osal toptarǵa bıznes bastaýǵa 400 AEK-ke deıingi granttar beriledi
ASTANA. KAZINFORM — 2025 jylǵy 1 qyrkúıekte respýblıka boıynsha 4 287 grant berildi, dep habarlaıdy Eńbekmıni baspasóz qyzmeti.
2025 jylǵy 1 qyrkúıektegi jaǵdaı boıynsha jumyspen qamtýǵa járdemdesýdiń belsendi sharalarymen 237,3 myń adam qamtyldy, 529,6 myń qazaqstandyq jumysqa ornalastyryldy.
— Sýbsıdııalanatyn jumys oryndaryna mansap ortalyqtary arqyly 137 myń adam jiberildi, onyń ishinde: áleýmettik jumys oryndarynda 12 myń adam, jastar praktıkasynda 12,6 myń adam, qoǵamdyq jumystarda 92,8 myń adam, «Kúmis jas» jobasy aıasynda 15,9 myń adam, «Alǵashqy jumys orny» jobasy boıynsha 3,5 myń adam, «Urpaqtar kelisimsharty» jobasy sheńberinde 171 adam jumyspen qamtyldy, — delingen mınıstrlik taratqan aqparatta.
Eńbek naryǵyndaǵy suranysqa ıe daǵdylar boıynsha onlaın oqytýmen 51,1 myń jumyssyz qamtyldy, onyń ishinde 47,6 myńy oqýdy aıaqtady.
«Bastaý Bıznes» jobasy boıynsha kásipkerlik negizderine oqytýmen 44,3 myń adam qamtyldy, onyń ishinde 25,4 myń adam oqýdy aıaqtap, sertıfıkattar aldy.
Jumys berýshilerdiń ótinishi boıynsha kásiptik oqytýǵa 4 892 adam jiberildi, onyń ishinde 1 114 adam oqýdy aıaqtady. Oqýdy aıaqtaǵannan keıin 375 adam jumysqa ornalasty.
Budan basqa, qyzmet salasyn tańdaý maqsatynda kásiptik ortalyqtarda 261,9 myń adam áleýmettik kásiptik baǵdarlaýdan ótip, keńes berý qyzmetterin aldy.
Azamattardy jumysqa ornalastyrý birneshe baǵyt boıynsha júzege asyrylatynyn jáne shyn máninde jumysqa ornalasqandyǵy olar úshin mindetti zeınetaqy jarnalarynyń aýdarylýymen rastalatynyn atap ótken jón.
Máselen, 2025 jylǵy 1 qyrkúıekte 529,6 myń adam jumysqa ornalastyryldy, onyń ishinde: halyqty jumyspen qamtýǵa járdemdesýdiń belsendi sharalary sheńberinde — 137 myń adam; Elektrondyq eńbek bırjasynda jumys berýshiler ornalastyrǵan bos bos oryndarǵa — 108,7 myń adam; Memleket basshysynyń «10 myń turǵynǵa 100 jumys orny» bastamasy sheńberinde — 263,9 myń adam; ortalyq memlekettik organdar iske asyratyn jobalar sheńberinde — 20 myń adam.
Sonymen qatar, 2025 jyly halyqtyń áleýmettik osal sanattaryna jańa bıznes-bastamalardy júzege asyrý úshin 400 AEK-ke deıin (1 572 800 teńge) 9 myń grant berý kózdelgen. 2025 jylǵy 1 qyrkúıekte respýblıka boıynsha 4 287 grant berildi.
Osyǵan deıin Eńbek jáne halyqty áleýmettik qorǵaý mınıstrligi jańa jumys kestesine kóshkenin jazǵan edik.