Áleýmettik osal toptarǵa 1,7 mln teńgege deıin grant beriledi
ASTANA. KAZINFORM – 2026 jylǵy 1 mamyrdaǵy jaǵdaı boıynsha jumyspen qamtýǵa járdemdesýdiń belsendi sharalarymen 101,3 myń adam qamtylyp, 140,8 myń qazaqstandyq jumysqa ornalastyryldy.
Memleket halyqty jumyspen qamtý deńgeıin arttyrýǵa, kásipkerlikti damytýǵa jáne azamattardyń eńbek naryǵynda suranysqa ıe daǵdylardy meńgerý múmkindikterin keńeıtýge baǵyttalǵan keshendi sharalardy iske asyrýdy jalǵastyrýda. Bul óńirlik jumyspen qamtý kartalary, ulttyq jobalar jáne halyqty qoldaýǵa arnalǵan memlekettik baǵdarlamalar aıasynda júrgizilýde.
Negizgi baǵyttardyń biri — sýbsıdııalanatyn jumys oryndaryn uıymdastyrý. Búginde mundaı jumys oryndaryna 50,6 myń adam joldandy. Onyń ishinde 37,6 myń adam qoǵamdyq jumystarǵa, 5,4 myń adam áleýmettik jumys oryndaryna, 2,7 myń jas maman jastar praktıkasyna, al 4,9 myń adam «Kúmis jas» jobasy aıasynda jumysqa ornalastyryldy.
Sonymen qatar azamattardyń biliktiligin arttyrýǵa jáne eńbek naryǵynda suranysqa ıe jańa daǵdylardy meńgerýine erekshe nazar aýdarylýda. Onlaın oqýmen 31,7 myń jumyssyz azamat qamtyldy. Onyń ishinde 25,1 myń adam oqý kýrstaryn aıaqtap, tıisti sertıfıkattarǵa ıe boldy.
Budan bólek, halyqtyń kásipkerlik daǵdylaryn damytýǵa baǵyttalǵan «Bastaý Bıznes» jobasy jalǵasyp jatyr. Jyl basynan beri kásipkerlik negizderine 16,9 myń adam oqytylyp, onyń 7,3 myńy oqýyn aıaqtap, sertıfıkat aldy.
Jumys berýshilerdiń suranysyna sáıkes kadr daıarlaý maqsatynda 2 119 adam kásiptik oqýǵa jiberildi. Bul shara óńirlik eńbek naryǵynyń qajettilikterin eskere otyryp, kásiporyndardy qajetti mamandarmen qamtamasyz etýge múmkindik beredi.
Sonymen qatar mansap ortalyqtarynda azamattardy kásiptik baǵdarlaý jumystary belsendi júrgizilýde. Áleýmettik kásiptik baǵdar berý jáne konsýltatsııalyq qyzmetterdi 142,8 myń adam aldy. Bul azamattardyń mamandyqty sanaly tańdaýyna jáne eńbek naryǵyndaǵy básekege qabilettiligin arttyrýǵa yqpal etedi.
Aıta ketý kerek, azamattardy jumysqa ornalastyrý birneshe baǵyt boıynsha júzege asyrylady jáne mindetti zeınetaqy jarnalarynyń aýdarylýymen rastalady.
2026 jylǵy 1 mamyrdaǵy jaǵdaı boıynsha 140,8 myń adam jumysqa ornalastyryldy. Onyń ishinde:
— jumyspen qamtýǵa járdemdesýdiń belsendi sharalary aıasynda — 50,6 myń adam;
— Elektrondyq eńbek bırjasynda jumys berýshiler jarııalaǵan bos jumys oryndaryna — 48,3 myń adam;
— Memleket basshysynyń «10 myń turǵynǵa 100 jumys orny» bastamasy aıasynda — 40 myń adam;
— ortalyq memlekettik organdar iske asyryp jatqan jobalar sheńberinde — 1,9 myń adam.
Sonymen qatar 2026 jyly halyqtyń kásipkerlik belsendiligin qoldaý maqsatynda áleýmettik osal sanattaǵy azamattarǵa jańa bıznes-bastamalardy júzege asyrý úshin 400 AEK-ke deıingi mólsherde, ıaǵnı 1 730 000 teńge kóleminde 9 myń memlekettik grant berý kózdelgen.
Jumyspen qamtýǵa járdemdesý sharalary elimizdiń barlyq óńirinde jalǵasyp, halyqtyń turaqty jumyspen qamtylýyn qamtamasyz etýge, azamattardyń tabysyn arttyrýǵa jáne adamı kapıtaldy damytýǵa baǵyttalǵan.
Aıta ketelik Qazaqstanda 2026 jylǵy I toqsanda jumyssyzdyq deńgeıi 4,5% boldy.
