Áleýmettik osal top jáne tótenshe jaǵdaıdan zardap shekkender kredıtin keıin óteı alady

ASTANA. KAZINFORM — Qarjy naryǵyn retteý jáne damytý agenttigi mıkrokredıt berý qaǵıdalary men bank qaryzy shartynyń talaptaryna ózgerister men tolyqtyrýlar engizdi. Qujat «Ashyq NQA» portalynda jarııalandy. 

— Joba qarjy naryǵyn damytý, qarjy qyzmetin tutynýshylardyń quqyǵyn qorǵaý, artyq zańnamalyq reglamentti boldyrmaý máseleleri boıynsha ózgerister men tolyqtyrýlar engizý týraly zańdy iske asyrýǵa ázirlendi, — delingen qujatta.

Ózgerister kelesi eki jaıtty kózdeıdi:

— áleýmettik osal topqa jatatyn jáne tótenshe jaǵdaıdan zardap shekken azamattardyń qaryzyn óteýin keıinge qaldyrýdy engizý;

— rastaıtyn qujattar bolǵan kezde qaryz alýshynyń, ıaǵnı áleýmettik osal topqa jatatyn jáne tótenshe jaǵdaıdan zardap shekken azamattyń tabysy tómendegen kezde komıssııasyz keminde úsh aıǵa keıinge qaldyrý mindetin belgileý.

— Ózgerister men tolyqtyrýlar áleýmettik osal topqa jatatyn azamattarmen jalpy qaryz alǵan jeke tulǵalardyń problemalyq bereshegin retteý tetikteriniń tıimdiligin arttyrýǵa, sondaı-aq qaryz alýshylardyń banktik qaryz, mıkrokredıt shartynyń talaptaryna ózgerister engizý týraly ótinishti qaraý kezinde bank pen mıkroqarjy uıymdary qyzmetinde ashyqtyq pen birkelkilikti qamtamasyz etýge baǵyttalǵan, — deıdi Qarjy naryǵyn retteý jáne damytý agenttiginen.

Eske salaıyq, bıyl mamyrda Senat azamattardyń boryshtyq júktemesin azaıtatyn zańdy talqylady.