Áleýmettik osal toptaǵy úılerdiń 25%-ynda órtke qarsy datchık ornatylmaǵan

ASTANA. KAZINFORM — Jyl saıyn úılerde tirkeletin órtterdiń 86 paıyzy jer úılerge tıesili.

Al áleýmettik osal tapqa jatatyn turǵyndar panalaıtyn jer úılerdiń 25 paıyzynda órtke qarsy ıisti gaz dabyly ornatylmaǵan. Tótenshe jaǵdaılar mınıstrligi Órtke qarsy qyzmet komıteti tóraǵasynyń orynbasary Qanat Dospaev elordada ótken baspasóz máslıhatynda osyndaı derek keltirdi.

— Kún saıyn bizdiń bólimsheler orta eseppen ár túrli sıpattaǵy 100-150 tótenshe jaǵdaıdy joıýǵa shyǵady. Onyń negizgi úlesin órtter alyp otyr. Ótken jylytý kezeńinde 4 041 órt tirkelip, 416 adam qutqaryldy. Ókinishke qaraı, 187 adam qaza tapty, 162 adam ártúrli dárejedegi kúıik alyp, ýlandy. Bir jyl burynǵy sandarmen salystyrsaq, órtterdiń sany 16 paıyz, qazaq tapqandar sany 3 paıyz, jaraqat alǵandar sany 12 paıyz ósti. Aldyn alýdyń basym baǵyttarynyń biri jeke turǵyn úılerdi ıisti gaz datchıkterimen jaraqtandyrý boldy. Halyqtyń áleýmettik osal toptarynyń úılerinde 36 myńnan astam datchık ornatyldy. Jalpy bul sanattaǵy úılerdiń órt dabylymen jabdyqtalý deńgeıi 75 paıyz bolyp otyr, — dedi ol.

Komıtet basshysy jer úılerge ıisti gaz dabylyn ornatý tájirıbesi bastalǵannan beri 66 datchık der kezinde iske qosylyp, 281 adam aman qalǵanyn aıtady.

— Jylytý maýsymyndaǵy órtterdiń 86 paıyzy jer úıler men qosalqy qora-jaılarda, 13 paıyzy kóppáterli turǵyn úılerde bolady. Jylytý maýsymynda bolǵan órtterden qaza tapqan 57 adam ýaqytsha jumys istemeıtin tulǵa ekeni, 53 adam zeınetker bolǵany, 18 adam mektepke deıingi jastaǵy sábı bolǵany anyqtaldy, — degen mınıstrlik ókili ata-analardy balalaryn qaraýsyz qaldyrmaýǵa shaqyrdy.

Eske sal salsaq, Premer-mınıstr Oljas Bektenov Tótenshe jaǵdaılar mınıstrligine mamyr aıynyń sońyna deıin tabıǵı órtke qarsy respýblıkalyq komandalyq shtabtyq oqý-jattyǵý ótkizýdi tapsyrǵan bolatyn.