Áleýmettik nysandarda jańa múmkindik: týystar beınejazbalardy kóre alady
ASTANA. KAZINFORM — Eńbek jáne halyqty áleýmettik qorǵaý mınıstrligi arnaýly áleýmettik qyzmetter kórsetetin uıymdarda ıntellektýaldy beınebaqylaý júıesin engizýdi kózdeıtin jobany ázirledi.
Jańashyldyqtyń basty maqsaty — statsıonarlyq jáne jartylaı statsıonarlyq uıymdarda qyzmet alatyn azamattardyń qaýipsizdigin kúsheıtý. Osy baǵytta vedomstvo «ProtectorAI» júıesin engizýdi josparlap otyr. Beıneni taldaýǵa arnalǵan ıntellektýaldy júıe áleýmettik mekemeler aýmaǵynda qyzmet alýshylarǵa qatysty agressıvti minez-qulyqty, býllıngti jáne ózge de qaýip-qaterlerdi erte anyqtaýǵa múmkindik beredi.
Jobaǵa sáıkes, jańa úlgidegi beınebaqylaý júıeleri uıym aýmaǵyn, negizgi jáne qosalqy kireberisterdi, ortaq paıdalanylatyn bólmeler men kabınetterdi, sondaı-aq qoıma úı-jaılaryn mindetti túrde qamtıtyn bolady.
— Qujatta áleýmettik mekemeler qyzmetiniń ashyqtyǵyn qamtamasyz etý jáne qyzmet alýshylardyń quqyqtaryn qorǵaý máselesine erekshe nazar aýdarylǵan. Erejelerge sáıkes, jaqyn týystarynyń resmı ótinishi negizinde olarǵa beınebaqylaý kameralaryndaǵy jazbalardy qaraý múmkindigi beriledi, — delingen habarlamada.
«QR Premer-Mınıstriniń orynbasary — Eńbek jáne halyqty áleýmettik qorǵaý mınıstriniń 2023 jylǵy 22 maýsymdaǵy № 230 buıryǵyna ózgerister men tolyqtyrýlar engizý týraly» buıryq jobasy «Ashyq NQA» portalynda jarııalanyp, talqylaýǵa usynyldy.
Osydan buryn Astana turǵyndaryna jyl basynan beri qandaı áleýmettik kómek kórsetilgenin jazdyq.
