Áleýmettik nysandarda 1 371 tekserý júrgizilip, 79,7 mln teńgeden astam aıyppul salyndy
ASTANA. KAZINFORM — 2025 jyldyń basynan beri áleýmettik ınspektorlar 1 371 tekserý júrgizdi, onyń 466-i jospardan tys, 558 – profılaktıkalyq baqylaý aıasynda, 347 – prokýratýranyń talaby boıynsha ótti.
Eńbek jáne halyqty áleýmettik qorǵaý mınıstrliginiń málimetinshe tekserý qorytyndysy boıynsha anyqtalǵan buzýshylyqtardy joıý týraly 704 uıǵarym berildi, 79,7 mln teńgeden astam somaǵa 349 aıyppul salyndy.
Memlekettik baqylaýmen qamtylǵandar: memlekettik jáne kvazımemlekettik uıymdar — 273, densaýlyq saqtaý nysandary — 170, bilim berý — 228, áleýmettik qorǵaý — 315, mádenıet — 56, sport — 55, kólik ınfraqurylymy — 44, qoǵamdyq tamaqtaný — 26, saýda — 93, qarjy qyzmetin kórsetý 24 jáne basqa da nysandar — 87.
Osylaısha, Eńbek jáne halyqty áleýmettik qorǵaý mınıstrligi Halyqty áleýmettik qorǵaý salasyndaǵy retteý jáne baqylaý komıtetiniń Shyǵys Qazaqstan oblysy boıynsha departamenti Shyǵys Qazaqstan oblysy prokýratýrasynyń bastamasy boıynsha Shyǵys Qazaqstan oblysynyń dene shynyqtyrý jáne sport basqarmasyna qarasty 10 obektilerine qozǵalysy shekteýli toptar úshin nysandardyń qoljetimdiligi máselesi boıynsha jospardan tys tekserý júrgizdi. Tekserý qorytyndylarymen nusqamalar berilip, jaýapty tulǵalar ákimshilik jaýapkershilikke tartyldy.
— Sońǵy jyldary qala ınfraqurylymynda eleýli oń ózgerister baıqalady. Múgedektigi bar adamdar úshin áleýmettik mańyzy bar nysandardyń qoljetimdiligi artty, memlekettik uıymdar, medıtsınalyq mekemeler men qoǵamdyq keńistikter beıimdeldi. Munyń barlyǵy bizdiń kúndelikti ómirimizdi jeńildetip, qajetti qyzmetterdi kedergisiz alýǵa jaǵdaı jasap otyr, — dedi Óskemen qalasynyń turǵyny, birinshi toptaǵy múgedektigi bar Aınur Qalıeva.
Aıta ketelik Almatyda áleýmettik ınspektorlardyń tekserýinen soń múgedekterge birshama qolaıly jaǵdaı qalyptasqan edi.
