Áleýmettik nysandar qurylys josparynan zańsyz alynyp jatyr – senator dabyl qaqty
Senator Andreı Lýkın Úkimet basshysy Álıhan Smaıylovtyń atyna joldaǵan depýtattyq saýalynda qala qurylysy salasyna baqylaý jasaýdaǵy ózekti máselelerdi kóterdi, dep habarlaıdy Kazinform.
Depýtattyń aıtýynsha, bul salada Qurylys jáne turǵyn úı-kommýnaldyq sharýashylyq isteri komıteti tıisti baqylaý jasamaı, saldarynan jer men qurylysqa ruqsat alýda azamattardyń pikiri, ınjenerlik ári kóliktik, áleýmettik ınfraqurylym múmkindikteri múlde eskerilmeıdi.
«Ákimdik pen qurylys kompanııalarynyń aıla-sharǵysynyń saldary qalalardyń júıesiz salynýyna, qala ortasy men jasyl aımaqtardyń azyp-tozýyna, halyqtyń ómir súrý sapasynyń tómendeýine alyp kelip jatyr. Jergilikti atqarýshy organdardyń bul áreketi azamattardyń ashý-yzasyn týdyryp otyr. Jergilikti atqarýshy organdar ýchaskelerin berý kezinde jer zańnamasyn, sondaı-aq bas jospardyń talaptaryn saqtamaıtyny anyqtaldy», – dedi A. Lýkın.
Senator Astana, Almaty, Shymkent qalalary men oblystyq mańyzy bar taǵy 9 qalanyń bas josparyndaǵy jer ýchaskeleriniń nysanaly maqsatyn zańsyz ózgertý men egjeı-tegjeıli josparlaý jobasyn túzetýdiń 1 myń faktisi týraly derekti keltirdi. Bul óńirlerde oqý oryndary men aýrýhana oryndarynyń tapshylyǵy qoǵamda únemi talqylanyp otyrsa da, áleýmettik maqsattaǵy obektiler negizsiz alynyp tastalǵan.
«Qalalardyń bas josparlary eskirgen jáne qazirgi naqty jaǵdaıǵa saı kelmeıdi, demografııa, halyqty jylýmen qamtamasyz etý men basqa da máseleler eskerilmegen. Joǵaryda atalǵan máselelerdi sheshý úshin, zań talaptarynyń buzylýyna jol bermeý úshin Jol kartasyn ázirleý múmkindigin qarastyrý usynylyp otyr», – dedi depýtat.
Andreı Lýkın sonymen qatar bas josparlardyń jobalaryna qala qurylysy jóninde keshendi taldaý júrgizý kerek ekenin aıtty. Jáne bar kemshilikti eskere otyryp olarǵa mańyz berýdi, josparlardyń egjeı-tegjeıli jobalaryn zańsyz túzetý, jer ýchaskeleriniń nysanaly maqsatyn ózgertý, sondaı-aq eldi mekenderdiń bas josparlaryna sáıkes kelmeıtin ruqsat qujattaryn berý tájirıbesin alyp tastaýdy usyndy.
