Áleýmettik medıtsınalyq saqtandyrý qory 2,4 trln teńgege medıtsınalyq qyzmetter satyp alady
ASTANA. KAZINFORM – Áleýmettik medıtsınalyq saqtandyrý qory basqarma tóraǵasynyń orynbasary Aıdar Nuralıev 2024 jylǵa arnalǵan medıtsınalyq qyzmetterdi satyp alý naýqanynyń qorytyndysyn aıtyp berdi.
Satyp alý naýqanyn jetildirý aıasynda densaýlyq saqtaý sýbektilerinen qyzmetterdi esepke alý men satyp alý qaǵıdalaryna eleýli ózgeris engizilgen.
«Birinshiden, óńirlik komıssııalar kúsheıtildi. Endi densaýlyq saqtaý basqarmasynyń laýazymy orynbasardan tómen emes ókili komıssııa tóraǵasynyń orynbasary bolady. Sonymen qatar olardyń quramyna sanıtarlyq-epıdemıologııalyq baqylaý, medıtsınalyq jáne farmatsevtıkalyq baqylaý komıtetteriniń ókilderi kirdi. Ekinshiden, sany 1 500 adamnan kem medıtsınalyq-sanıtarlyq alǵashqy kómek sýbektileri úshin jáne tájirıbesi 1 jyldan asatyn, 3 000 adamnan kem emes uıymdar úshin qyzmetterdi satyp alýǵa qatysýǵa shekteýler engizildi», - dedi spıker Ortalyq kommýnıkatsııalar qyzmetinde ótken saraptamalyq dóńgelek ústelde.
2023 jyldyń jeltoqsanynda medıtsınalyq uıymdardan ótinimder qabyldandy jáne nátıjesinde Áleýmettik medıtsınalyq saqtandyrý qory 1 921 medıtsınalyq uıymmen kelisimsharttar jasady. Bul ótken jylmen salystyrǵanda 56 uıymǵa az. Onyń 64%-y nemese 1 214-i – jeke klınıkalar. Jalpy jetkizýshilerge bıyl 2,4 trln teńge bólingen.
