Áleýmettik máselelerdi sheshýge baǵyttalǵan naqty is-qımyldy kúsheıtýimiz kerek — Ermek Kósherbaev

ASTANA. KAZINFORM — Eńbek jáne halyqty áleýmettik qorǵaý mınıstrliginiń keńeıtilgen alqa májilisinde Premer-Mınıstrdiń orynbasary Ermek Kósherbaev shetelde jumys istep júrgen otandastarymyzdyń quqyqtaryn qorǵaý máselesine nazar aýdartty.

— Memleket basshysynyń tapsyrmasyna sáıkes, halyqtyń áleýmettik jaǵdaıyn jaqsartý baǵytynda aýqymdy jumys atqarylyp jatyr. Degenmen, qarapaıym azamattar tarapynan kelip túsetin shaǵymdar men ótinishter azaımaı tur. Halyqtyń muń-muqtajyna jedel, tıimdi jaýap berip, áleýmettik máselelerdi sheshýge baǵyttalǵan naqty is-qımyldy kúsheıtýimiz kerek, — dedi vıtse-premer.

Sonymen qatar ol elimizdiń Soltústik jáne Shyǵys Qazaqstan syndy oblystarynyń shekara mańyndaǵy aýyldarda halyqtyń joq ekendigine nazar aýdartty.

— Máselen, Tarbaǵataı, Marqakól aýdandaryna barǵanymda jergilik turǵyndar basqa óńirde júrgen aýyldastaryn qaıta kóshirýge kómek kórsetýdi surady. Árıne, bir jaǵynan qıyn. Degenmen, jaǵdaı jasasaq olar kóship keledi. Byltyr Túrkistan oblysynan 40-tan astam otbasy Marqakól aýdanyna kóship keldi. Jartysy keri qaıtyp ketti. Óıtkeni, qysty kúni qıyndaý. Ońtústikten barǵandar qysta Marqakólde 3-4 metr qar, aıaz bolǵanda shydaı almaıdy. Biraq, mektep, ınternet, sýmen, jylýmen qamtý, mal baǵý úshin jer máselesin sheship bersek, halyq barady. Sol jumysty jalǵastyrý qajet, — dedý Ermek Kósherbaev.

Munan bólek, Úkimet basshysynyń orynbasary shetelde jumys istep júrgen Qazaqstan azamattarynyń quqyqtaryn qorǵaý máselesine toqtaldy. 

— Árıne, búginde olardyń kóbi zańsyz jumys istep jatyr. Koreıada, AQSh-ta da azamattarymyz bar. Eńbek mınıstrligi Syrtqy ister mınıstrligimen birlesip, shetelderdiń tıisti vedomstvolarymen kelisimsharttar jasasý jumysyn jalǵastyrýy kerek, — dedi ol.

Buǵan deıin habarlanǵandaı, sheteldik jumys kúshin tartý kvotasy jyl saıyn qysqartylmaq.