Áleýmettik mańyzy bar taýarlar tizbesi keńeıtiledi: jańa jyl aldynda baǵany baqylaý kúsheımek
ASTANA. KAZINFORM — Premer-mınıstrdiń orynbasary – ulttyq ekonomıka mınıstri Serik Jumanǵarınniń tóraǵalyǵymen ótken ınflıatsııany turaqtandyrý jónindegi kezekti keńeste azyq-túlik baǵasyn ustap turýǵa baǵyttalǵan qoldanystaǵy jáne jeltoqsan aıyna josparlanǵan sharalar qaraldy. Bul týraly Úkimet málim etti.
Qarashanyń alǵashqy úsh aptasy áleýmettik mańyzy bar azyq-túlik taýarlarynyń baǵa ósimi 0%-dy qurady. Jeltoqsan — dástúrli túrde tutynýshylyq suranys artatyn kezeń. Jıynǵa qatysýshylar sýpermarketter men bazar sórelerinde suranysy joǵary taýarlardyń jetkilikti bolýy jáne baǵa turaqtylyǵyn qamtamasyz etýge qajetti sharalar keshenin talqylady.
Áleýmettik mańyzy bar taýarlar tizbesin keńeıtý
Saýda jáne ıntegratsııa mınıstrliginiń Saýda komıteti áleýmettik mańyzy bar azyq-túlik taýarlarynyń tizbesin ýaqytsha keńeıtý týraly jobany ázirledi. Tizim baǵasy jıi qubylatyn taýarlarmen tolyqtyryldy. Qujat kelisý satysynda. Jaqyn kúnderi bıznes-qoǵamdastyqpen jáne «Atameken» UKP-men egjeı-tegjeı talqylaýlar ótkiziledi.
Óńirlerdegi jármeńkeler jáne «Bereke fest» aktsııasy
Óńirlerde aýyl sharýashylyǵy jármeńkeleri jalǵasýda: bıyl 5 myńnan astam jármeńke ótti jáne olar demalys saıyn uıymdastyrylyp otyrdy.
Jeltoqsan aıynda saýda jelilerimen birlesip, respýblıkalyq «Bereke fest» aktsııasy qaıta ótkizilmek. Sonymen qatar jergilikti ákimdikter taýarlardyń keń tańdaýyn qoljetimdi baǵamen usyný maqsatynda jańa jyl aldynda jármeńkeler uıymdastyrady.
Azyq-túlik ımporttaýshylarymen jumys
Importtyq azyq-túlikke degen maýsymdyq joǵary suranysty eskere otyryp, Saýda komıteti iri ımporttaýshylar men azyq-túlik jetkizýshileriniń pýlyn qalyptastyrdy. Jaqyn ýaqytta olarmen jeltoqsan aıynda suranysy joǵary taýarlardyń baǵa turaqtylyǵyn qamtamasyz etý máseleleri boıynsha kezdesýler ótedi.
Baǵa monıtorıngi keńes qorytyndysy boıynsha Premer-mınıstrdiń orynbasary Saýda jáne ıntegratsııa mınıstrligine ákimdiktermen birlesip, baǵa monıtorıngin turaqty júrgizýdi jáne jaǵdaıǵa jedel áreket etýdi tapsyrdy.
Aıta keteıik, buǵan deıin joldardy jóndeý tsıfrlyq teńge arqyly qarjylandyrylatyny habarlandy.