Úkimette taýar baǵasyn turaqtandyrý jáne ınflıatsııany tejeý máselesi talqylandy
ASTANA.KAZINFORM - Úkimette jańa ónim kelisimsharty men turaqtandyrý qorlaryn baqylaýdy kúsheıtý máselesi talqylandy.
Vıtse-premer — Ulttyq ekonomıka mınıstri Serik Jumanǵarınniń tóraǵalyǵymen ótken áleýmettik mańyzy bar taýarlar baǵasyn turaqtandyrý jáne ınflıatsııany tejeý jónindegi apta saıynǵy keńeste 2025-2026 jyldarǵa arnalǵan turaqtandyrý qorlaryn tolyqtyrý úshin jańa ónim boıynsha kelisimshart jasaý barysy men sońǵy aptadaǵy baǵa dınamıkasy talqylandy.
Ekinshi apta qatarynan áleýmettik taýarlar baǵasynyń ortasha ındeksi 0% deńgeıinde saqtalyp otyr. Ótken aptada birqatar taýar baǵasynyń tómendeýi baıqaldy: kúrish (-0,2%), qyryqqabat (-2,2%), sábiz (-4,1%), kartop (-5,7%), pııaz (-9%).
Sıyr eti naryǵyndaǵy jaǵdaı bólek qaraldy. Aptalyq baǵanyń 0,8%-ǵa ósýimen jyl basynan beri jıyntyq ózgeris 20,2% boldy. Bul álemdik et baǵasynyń ósý qarqynynan jáne kórshi elderdegi baǵadan tómen.
– Qazaqstandyq sıyr eti básekege qabiletti: eldegi ortasha baǵa bir kg úshin 3105 teńge, bul EAEO elderi men Ózbekstanǵa qaraǵanda tómen. Bul rette kórshi elder tarapynan suranys turaqty joǵary ekenin atap ótý kerek, - dedi Saýda jáne ıntegratsııa birinshi vıtse-mınıstri Aıjan Bıjanova.
Kelesi maýsymda kartop baǵasyn ósýin aldyn alý úshin Saýda mınıstrligi Aýyl sharýashylyǵy mınıstrligimen, ákimdiktermen jáne kartop ósirýshiler odaǵymen birlesip turaqty jetkizilimder men baǵalar týraly memorandým daıyndap jatyr.
Aýyl sharýashylyǵy vıtse-mınıstri Erbol Tasjúrekovtiń málimetinshe, 22 tamyzdaǵy aqparat boıynsha qyryqqabat – 317,9 myń tonna, kartop – 512,9 myń tonna, pııaz – 226,8 myń tonna, sábiz 98,8 myń tonna jınaldy.
Sonymen qatar barlyq óńir kúzgi-qysqy jáne kóktemgi kezeńderde qoljetimdi baǵalardy qamtamasyz etý úshin turaqtandyrý qorlaryna kúzgi kókónisterdi kelisimsharttaýdy aıaqtaǵan joq. Vıtse-premer SIM-ge ónimniń jetkilikti kólemde bolýy men sapasyn únemi baqylaý úshin turaqtandyrý qorlaryn tekserý algorıtmin ázirleýdi tapsyrdy.
Sondaı-aq keńeste turaqtandyrý qorlaryn baqylaý úderisin tsıfrlandyrý boıynsha bastama kóterildi. Áleýmettik mańyzy bar azyq-túlik ónimderiniń túsýin jáne shyǵýyn tirkeý úshin beınemonıtorıng júıelerimen ári kókónis qoımasynyń skanerleýshi qurylǵylarymen jaraqtandyrý usynylady.
Bul ónim qozǵalysynyń ashyqtyǵyn jáne ony onlaın rejımde baqylaýdy qamtamasyz etýge múmkindik beredi.
Serik Jumanǵarın bul bastamany qoldap, óńirlerge ony engizý tetikterin pysyqtaýdy tapsyrdy.
Áleýmettik mańyzy bar azyq-túlik taýarlary tranzıtine baqylaý kúsheıgenin jazǵan edik.