Áleýmettik mańyzy bar ónimder qataryna qosylýy múmkin jańa taýarlar anyqtaldy

ASTANA. KAZINFORM — Senbi kúni vıtse-premer – ulttyq ekonomıka mınıstri Serik Jumanǵarınniń tóraǵalyǵymen ınflıatsııany turaqtandyrý máseleleri jónindegi kezekti keńes ótti, dep habarlaıdy Úkimettiń baspasóz qyzmeti.

Onda áleýmettik mańyzy bar taýarlar tizbesin keńeıtý múmkindigin qarastyrý maqsatynda azyq-túlik sebetine júrgizilgen taldaýdyń aldyn ala nátıjeleri usynyldy. 

Qarashanyń úshinshi aptasynda áleýmettik mańyzy bar azyq-túlik taýarlarynyń baǵasy ózgerissiz qaldy.

Saýda jáne ıntegratsııa birinshi vıtse-mınıstri Aıjan Bıjanovanyń aıtýynsha, qazan aıynda azyq-túlik ınflıatsııasyna eń joǵary úles qosqan ónimder qatarynda qyzanaq (15,8%), tartylǵan et (3%), súıeksiz sıyr eti (2,2%), súıekti jylqy eti (1,5%), qııar (7,4%), balyq (2,6%), banan (2,8%) jáne basqa da ónimder bar. Sonymen birge, jyldyq kórsetkish boıynsha (ótken jylǵy 10 aımen salystyrǵanda) qyzanaq 36,6%-ǵa, qııar 43,4%-ǵa arzandaǵan.

— Barlyq óńirdiń azyq-túlik ınflıatsııasyna qatysty taldaýy nátıjesinde baǵa ósimine eń kóp yqpal etip otyrǵan, alaıda áleýmettik mańyzy bar taýarlar tizbesine kirmeıtin 30 taýar anyqtaldy. Olardyń ishinde túrli et, balyq, almurt, alma, lımon, shaı, syr, sýyqtaı qaqtalǵan skýmbrııa, banan, qyzanaq, qııar jáne basqa da azyq-túlik taýarlary bar. Bul ónimderdiń arasynda ımport úlesi joǵary taýarlar da, kóbine aılyq ınflıatsııaǵa áser etip, jyldyq ınflıatsııaǵa aıtarlyqtaı yqpal etpeıtin pozıtsııalar da kezdesedi. Osy tizimniń ishinen áleýetti túrde áleýmettik mańyzy bar taýarlar qataryna engizýge bolatyn 23 pozıtsııa irikteldi. Endigi mindet – bul usynystardy bıznes ókilderimen talqylaý, — dedi Aıjan Bıjanova. 

Tizbeniń keńeıtilýi kásipkerler úshin birqatar mindetteme oryndaýdy talap etedi. Máselen, mámileler ashyqtyǵyn qamtamasyz etý, sharttardy rásimdeý, shot-faktýralar men fıskaldyq chekterdi ýaqtyly shyǵarý, sondaı-aq zańnamada belgilengen 15%-dan aspaıtyn saýda ústemesin saqtaý.

Bul sharalar eń suranysqa ıe azyq-túlik taýarlarynyń aınalymynda ashyqtyqty arttyrýǵa jáne deldaldyq shemalardyń sońǵy baǵaǵa yqpalyn tómendetýge baǵyttalǵan.

Keńes qorytyndysy boıynsha Serik Jumanǵarın Saýda jáne ıntegratsııa mınıstrligine bıznes-qoǵamdastyqpen, salalyq qaýymdastyqtarmen jáne «Atameken» UKP-men árbir usynylǵan pozıtsııany jeke talqylaýdy, sondaı-aq ımport qurylymyna qosymsha taldaý júrgizýdi tapsyrdy. Tıisti konsýltatsııalar tolyq aıaqtalǵannan keıin ǵana túpkilikti sheshim qabyldanady. 

Budan buryn Premer-mınıstrdiń orynbasary — Ulttyq ekonomıka mınıstri Serik Jumanǵarın Úkimet otyrysynan keıin ótip jatqan baspasóz máslıhatynda jylqy eti áleýmettik mańyzy bar taýarlardyń qataryna enýi múmkin ekenin aıtty.