Áleýmettik mańyzy bar qosymshalardy paıdalaný kezinde ınternet aqysy alynbaıdy
ASTANA. KAZINFORM — Qazaqstandyqtar áleýmettik jáne memlekettik mańyzy bar birqatar mobıldi qosymshany paıdalanǵan kezde ınternet trafıgi úshin aqy tólemeıdi. Bul týraly Ortalyq kommýnıkatsııalar qyzmetinde ótken brıfıngte QR Jasandy ıntellekt jáne tsıfrlyq damý vıtse-mınıstri Dosjan Musalıev málim etti.
Onyń aıtýynsha, bul norma Prezıdent 19 maýsymda qol qoıǵan telekommýnıkatsııa salasyna qatysty zańda kózdelgen. Qujat baılanys qyzmetiniń sapasy men qoljetimdiligin arttyrýǵa baǵyttalǵan.
— Azamattarǵa áleýmettik jáne memlekettik mańyzy bar mobıldi qosymshalarǵa tarıftelmeıtin qoljetimdilik beriledi. Olardyń qatarynda eGov, eGov Business, eOtinish, Aitu jáne basqa da qosymshalar bar. Tolyq tizim qazir kelisilip jatyr, — dedi Dosjan Musalıev.
Atalǵan qosymshalardy paıdalanǵan kezde jumsalǵan ınternet trafıgi abonenttiń tarıftik josparyna eseptelmeıdi.
Sonymen qatar jańa zań aıasynda abonenttik qurylǵylardy verıfıkatsııalaý qyzmeti memlekettik retteýge beriledi.
Vıtse-mınıstrdiń aıtýynsha, uıaly telefondardy verıfıkatsııalaý tetigi engizilgen bir jyl ishinde oń nátıje baıqalǵan. Osy kezeńde qoldanystaǵy júıedegi kemshilikter týraly qajetti málimet jınaldy. Endi olardy qurylǵylardy verıfıkatsııalaýdyń jańa qaǵıdalary aıasynda joıý josparlanyp otyr.
Budan bólek, zańda uıaly baılanys sıgnalyn kúsheıtetin qurylǵylardy ákelýge qatysty jańa talap engizilgen. Mundaı qurylǵylardyń baqylaýsyz qoldanylýy keıbir aýmaqta baılanys sapasynyń tómendeýine sebep bolǵan.
Osyǵan baılanysty endi uıaly baılanys sıgnalyn kúsheıtetin qurylǵylardy elge tek baılanys operatorlary ákele alady. Bul repıterlerden týyndaıtyn kedergini azaıtyp, baılanys sapasyn jaqsartýǵa múmkindik beredi.
Aıta keteıik, buǵan deıin Qazaqstanda 28 maýsymnan bastap uıaly baılanys qyzmetterin kórsetý qaǵıdalaryna ózgerister engizilip, operatorlarǵa abonentke kelisiminsiz aqyly qyzmetterdi qosýǵa jáne «maıak» habarlamalaryn jiberýge tyıym salynǵany týraly jazǵanbyz.
