Áleýmettik mańyzy bar azyq-túliktiń baǵa ındeksi qalaı ózgerdi

ASTANA. KAZINFORM — QR Saýda jáne ıntegratsııa mınıstrligi jyl basynan beri áleýmettik mańyzy bar azyq-túlik baǵasyna qatysty ózgeristerge túsinik berdi.

— Resmı statıstıkalyq derekterge sáıkes, 13 mamyrdaǵy jaǵdaı boıynsha áleýmettik mańyzy bar azyq-túlik taýarlarynyń (ÁMAT) baǵa ındeksi jyl basynan beri 106,2 paıyzdy qurady, — delingen mınıstrliktiń Kazinform agenttigine bergen jaýabynda.

Óńirlik bóliniste áleýmettik mańyzy bar azyq-túliktiń baǵa ındeksi jyl basynan bastap kelesideı deńgeıde boldy: Ulytaý oblysy — 109,9%, Aqtóbe oblysy — 108,1%, Aqmola oblysy — 107,9%, Abaı oblysy — 107,6%, Jetisý oblysy — 107,5%, Almaty oblysy — 107,1%, Jambyl jáne Soltústik Qazaqstan oblysy — 106,8%, Qaraǵandy oblysy — 106,6%, Shyǵys Qazaqstan oblysy –106,3%, Shymkent qalasy — 106,2%, Pavlodar oblysy — 106,1%, Qyzylorda oblysy — 106,0%, Qostanaı oblysy — 105,9%, Almaty qalasy — 105,8%, Mańǵystaý oblysy — 105,7%, Túrkistan oblysy — 105,2%, Batys Qazaqstan oblysy — 104,9%, Astana qalasy — 104,7%, Atyraý oblysy — 104%.

Osyǵan deıin saýda ústemesin asyryp qosqan kásipkerler jaýapkershilikke tartylǵanyn jazǵan edik. 

Budan buryn habarlanǵandaı, bıyl naýryzda QR Premer-mınıstriniń orynbasary — ulttyq ekonomıka mınıstri Serik Jumanǵarın jumys keńesin ótkizip, áleýmettik mańyzy bar azyq-túlik taýarlary baǵasynyń qazirgi jaǵdaıyn talqylady. Jıyn barysynda Úkimet basshysynyń orynbasary azyq-túlik baǵasyn tıimsiz retteıtin óńirlerdiń jumysyn synǵa aldy.