Áleýmettik mańyzy bar azyq-túlik taýarlarynyń tizimi keńeıtildi
ASTANA. KAZINFORM — Qazaqstanda áleýmettik mańyzy bar azyq-túlik taýarlarynyń jańartylǵan tizimi bekitildi. Endi oǵan 31 ataý engizildi. Bul týraly Ortalyq kommýnıkatsııalar qyzmetinde ótken brıfıngte QR Saýda jáne ıntegratsııa mınıstrligi Saýda komıtetiniń tóraǵasy Ernur Jaýtyqbaev aıtty.
Onyń aıtýynsha, tizimdi keńeıtý azyq-túlik baǵasynyń ósýin tejeýge, halyq úshin negizgi azyq-túlik taýarlarynyń qoljetimdiligin arttyrýǵa jáne ishki naryqtaǵy baǵa turaqtylyǵyn saqtaýǵa múmkindik beredi.
— Jańartylǵan tizimge qyzanaq, qııar, alma, súıekti jáne súıeksiz sıyr eti, tartylǵan et, qoı jáne jylqy eti, balyq, taýyq eti, ýltrapasterlengen jáne sterıldengen sút, maılylyǵy 2,5 paıyz aıran, qaımaq, qatty irimshik pen qara shaı engizildi, — dedi Ernur Jaýtyqbaev.
Komıtet tóraǵasynyń aıtýynsha, bul ózgeris áleýmettik mańyzy bar azyq-túlik taýarlaryna saýda ústemesin tıimdi retteýge, azyq-túlik ınflıatsııasyn tejeýge, otandyq óndiristi qoldaýǵa, baǵa belgileýdiń ashyqtyǵyn arttyrýǵa jáne alypsatarlyq táýekelderdi azaıtýǵa baǵyttalǵan.
Sonymen birge mınıstrlik taýar ótkizý tizbegindegi ónimsiz deldaldardy qysqartý úshin Іshki saýda qaǵıdalary men ulttyq standartqa ózgerister ázirlep jatyr. Sondaı-aq áleýmettik mańyzy bar azyq-túlik taýarlaryna saýda ústemesin belgileý tártibin qaıta qarap, saýda jelilerinde otandyq ónimderdiń úlesin arttyrý kózdelip otyr.
Aıta keteıik, buǵan deıin elimizde qandaı áleýmettik mańyzy bar taýarlardyń baǵasy tómendegenin jazdyq.
