Áleýmettik mańyzy bar azyq-túlik taýarlarynyń baǵa ındeksi ósken joq
ASTANA. KAZINFORM — Úkimette Premer-mınıstrdiń orynbasary — ulttyq ekonomıka mınıstri Serik Jumanǵarınniń tóraǵalyǵymen ótken jıynda áleýmettik mańyzy bar azyq-túlik taýarlary baǵasynyń bir aptadaǵy jaǵdaıy qaraldy. Bul týraly Úkimettiń baspasóz qyzmeti habarlady.
Áleýmettik mańyzy bar azyq-túlik taýarlary boıynsha ortasha baǵa ósiminiń ındeksi apta qorytyndysy boıynsha nól deńgeıinde saqtaldy. Alma (-2,1%), qııar men pııaz (-1,3%), shaı (-0,9%), balyq pen taýyq eti (-0,6%) jáne basqa da azyq-túlik ónimderiniń baǵasy arzandaǵan. Maýsymdyq faktorǵa baılanysty ózgedeı áleýmettik mańyzy bar kókónister boıynsha baǵa qubylmaly boldy.
Saýda jáne ıntegratsııa birinshi vıtse-mınıstri Aıjan Bıjanovanyń aıtýynsha, erte pisken ónimdi jetkizýdi qamtamasyz etý boıynsha qabyldanǵan basqa da sharalardan bólek, Saýda jáne ıntegratsııa mınıstrligi bıylǵy sáýir-maýsym aılary aralyǵynda úshinshi elderden kókónisterdi bajsyz ákelý týraly usynysty EAEO Keńesiniń qaraýyna shyǵarý týraly bastama kóterip otyr.
Jıyn barysynda vıtse-premer Astana jáne Almaty qalalary ákimderi orynbasarlarynyń óńirdegi qazirgi baǵa jáne ekonomıkalyq jaǵdaı týraly baıandamalaryn jeke-jeke tyńdady.
Elordada azyq-túlik ınflıatsııasynyń baıaýlaý úrdisi turaqty saqtalýda. 2025 jyldyń qorytyndysy boıynsha áleýmettik mańyzy bar azyq-túlik taýarlarynyń ortasha baǵa ındeksi 107,4%, bul — el boıynsha eń turaqty kórsetkishterdiń biri. Baǵanyń ósýin tejeý azyq-túlik taýarlary boıynsha ýaqtyly kelisimsharttar jasaý nátıjesinde múmkin bolyp otyr. Ónimder elordadaǵy 180-nen astam saýda núktesinde satylady. Іri saýda jelilerimen áleýmettik mańyzy bar taýarlarǵa saýda ústemesin shekteý jóninde kelisimder jasalǵan. Sonymen qatar baǵa qalyptastyrýdaǵy deldaldyq shemalardy anyqtaý jáne jármeńkelik saýdany damytý boıynsha jumys júrgizilýde. 2026 jyly Astanada 300-den astam demalys kúngi jármeńke ótkizý josparlanyp otyr. Jalpy el boıynsha shamamen 10 myń jármeńke uıymdastyrylmaq.
Almaty qalasynda 2025 jyldyń qorytyndysy boıynsha áleýmettik mańyzy bar azyq-túlik taýarlarynyń baǵa ındeksi 8,9%-dy, al bıylǵy jyldyń basynan beri 0,2%-dy qurady. Et jáne sút ónimderiniń negizgi túrlerine baǵa turaqty deńgeıde saqtalyp otyr, al taýyq eti men keıbir sút ónimderi arzandaǵan. Baǵanyń ósýi negizinen kókónisterdiń jekelegen túrleri men bakaleıa ónimderine tıesili, bul rette Almatyda qyryqqabat pen qaraqumyq jarmasynyń baǵasy el boıynsha ortasha kórsetkishten tómen. Baǵany odan ári turaqtandyrý úshin tikeleı jetkizip berý jelisin keńeıtý, demalys kúngi jármeńkeler aýqymyn arttyrý jáne qaladaǵy saýda jelileri men bazarlarda kúndelikti baǵa monıtorıngin kúsheıtý jumystary istelip jatyr.
Jıyn qorytyndysy boıynsha Serik Jumanǵarın aýmaqtyq saýda jáne tutynýshylardyń quqyqtaryn qorǵaý departamentterine óńirlerdegi jumysty kúsheıtýdi jáne áleýmettik mańyzy bar azyq-túlik taýarlaryna belgilengen shekti saýda ústemesiniń saqtalýyn tekserýdi jandandyrýdy tapsyrdy.
Aıta ketelik áleýmettik taýar baǵasyna qoldanylatyn 15 paıyzdyq ústeme shekteýi ulǵaıtylatyny týraly jazǵan edik.