Áleýmettik mańyzy bar azyq-túlik taýarlary tranzıtine baqylaý kúsheıdi
ASTANA. KAZINFORM — Saýda komıteti zańsyz jumyrtqa tasymaly men áleýmettik mańyzy bar azyq-túlik taýarlary tranzıtine baqylaýdy kúsheıtti
Saýda jáne ıntegratsııa mınıstrliginde elimizdiń ishki naryǵyna zańsyz jolmen ákelingen jumyrtqalardy satý máselesi jáne ýaqytsha shekteý sharalary engizilgen áleýmettik mańyzy bar azyq-túlik taýarlarynyń tranzıtin baqylaý tetikterin pysyqtaý jóninde keńes ótti. Atalǵan keńes Saýda komıtetiniń tóraǵasy Aıdar Ábildabekovtiń tóraǵalyǵymen ótti.
2025 jyldyń 4 sáýirinde Aýyl sharýashylyǵy mınıstriniń № 101 buıryǵyna sáıkes, ishki naryqtaǵy baǵany turaqtandyrý jáne dempıngtiń aldyn alý maqsatynda Qazaqstan Respýblıkasynyń aýmaǵyna taýyq jumyrtqalaryn ákelýge ýaqytsha tyıym salynǵan bolatyn.
Keńes jumysyna Aýyl sharýashylyǵy mınıstrligi, Qarjy mınıstrligi Memlekettik kirister komıteti, Qarjylyq monıtorıng agenttigi, Densaýlyq saqtaý mınıstrligi Sanıtarııalyq-epıdemıologııalyq baqylaý komıteti, Aýyl sharýashylyǵy mınıstrligi Veterınarııalyq baqylaý jáne qadaǵalaý komıteti, Ulttyq qaýipsizdik komıtetiniń Shekara qyzmeti men Qazaqstan qus ósirýshiler odaǵynyń ókilderi qatysty.
Jıyndy ótkizýge Qazaqstan qus ósirýshiler odaǵynan túsken ótinishter negiz boldy. Onda keıbir saýda oryndarynda memlekettik baqylaýsyz erkin satylyp jatqan ımporttyq jumyrtqalardyń zańsyz ákeliný jaǵdaılary týraly aqparat kórsetilgen. 2025 jyldyń maýsym aıynda júrgizilgen monıtorıng nátıjesinde elimizdiń birqatar óńirlerinde tańbalanbaǵan nemese kontrabandalyq sıpatqa ıe ónimderdiń satylyp jatqany anyqtalǵan. Bul jaǵdaılar ishki naryqtaǵy adal básekege nuqsan keltirip, tutynýshylardyń qaýipsizdigine qaýip tóndiredi.
Saýda komıtetiniń tóraǵasy Aıdar Ábildabekov memlekettik organdardyń ózara is-qımylyn kúsheıtý, áreketterin úılestirý, sondaı-aq buzýshylyqtarǵa jedel den qoıýǵa múmkindik beretin tıimdi monıtorıng tetikterin engizýdiń mańyzdylyǵyn atap ótti.
Keńes qorytyndysy boıynsha áleýmettik mańyzy bar azyq-túlik taýarlarynyń aınalymyn baqylaý júıesin jetildirý jáne ýaqytsha shekteý sharalary engizilgen ónimder boıynsha ýákiletti memlekettik organdar arasynda tıimdi ózara is-qımyldy qamtamasyz etý jóninde birlesken jumysty jalǵastyrý týraly ortaq sheshim qabyldandy.
Aıta ketelik áleýmettik mańyzy bar 5 túrli azyq-túliktiń baǵasy tómendegen edi.