Áleýmettik mańyzy bar azyq-túlik taýarlary baǵasynyń ósýi úsh esege tómendedi
ASTANA. KAZINFORM — Premer-mınıstrdiń orynbasary — ulttyq ekonomıka mınıstri Serik Jumanǵarınniń tóraǵalyǵymen ótken ınflıatsııany turaqtandyrý jónindegi kezekti keńeste birinshi toqsannyń aldyn ala qorytyndylary qaraldy. Bul týraly Úkimettiń baspasóz qyzmeti habarlady.
Saýda jáne ıntegratsııa mınıstrliginiń málimetinshe, naýryz aıynda áleýmettik mańyzy bar azyq-túlik taýarlary baǵasynyń ortasha ósý ındeksi 0,3%-dy qurady. Bul ótken jyldyń naýryz aıymen salystyrǵanda (0,9%) úsh ese tómen.
Jalpy alǵanda, birinshi toqsanda baǵa ósimi 1,2% boldy, bul da 2025 jyldyń osy kezeńindegi deńgeıden (3,8%) úsh ese tómen. Bul dınamıka baǵa ósiminiń turaqty baıaýlaýyn kórsetedi.
Keńeste resmı statıstıka tutyný baǵalary ındeksin esepteýdiń halyqaralyq ádistemesine sáıkes qalyptastyrylatyny jáne 537 taýar men qyzmet túrin qamtıtyny aıtyldy. Monıtorıng búkil el boıynsha 12 myńnan astam saýda nysanynda júrgiziledi. Іshki saýda júıesinde shamamen 760 myń kásipkerlik sýbektisi jumys isteıdi, olardyń 300 myńnan astamy azyq-túlik ónimderin satýmen aınalysady.
Baǵanyń negizgi tómendeýi kókónis toby boıynsha tirkeldi. Qyryqqabat 1,9%-ǵa, qyzanaq 2,6%-ǵa, pııaz 10,9%-ǵa, qııar 22,6%-ǵa arzandady. Jyl basynan beri qııar baǵasy 31,1%-ǵa tómendedi.
Saýda jáne ıntegratsııa birinshi vıtse-mınıstri Aıjan Bıjanovanyń aıtýynsha, naryqty otandyq ónimmen qamtamasyz etýdegi oń dınamıka kóbine jylyjaı sharýashylyqtaryn qoldaý baǵdarlamasynyń arqasynda múmkin boldy.
2025 jyldyń qorytyndysy boıynsha jylyjaılardyń jalpy alańy 1,33 myń gektardy qurap, 2024 jylmen salystyrǵanda 12,6 gektarǵa artty. Negizgi ósim fermerlik jylyjaılar esebinen qamtamasyz etildi — 713,3 gektardan 799,4 gektarǵa deıin.
— Qazirgi ýaqytta mınıstrlik ónerkásiptik jylyjaılarmen qyzanaq pen qııar baǵasyn turaqtandyrý jóninde memorandýmdar jasasý boıynsha kelissózder júrgizilip jatyr, — dep habarlady Aıjan Bıjanova.
Oǵan qosymsha «QTJ» UK» AQ áleýmettik mańyzy bar azyq-túlik taýarlarynyń barlyq túrin, sondaı-aq áleýmettik nan óndirýge arnalǵan undy tasymaldaýda temirjol tarıfterine aıtarlyqtaı jeńildikter berý máselesin pysyqtaýda.
Kóktemde erte pisetin kókónisterge baǵanyń maýsymdyq ósýi eskerile otyryp, el naryǵyndaǵy ótken jylǵy ónim qory men basqa elderden jetkiziletin erte pisetin ónimderdiń jaǵdaıy da óz aldyna bólek qaraldy. Qazirgi ýaqytta turaqtandyrý qorlaryndaǵy ótken jylǵy ónim qorlary qarqyndy túrde satylýda. Aýyl sharýashylyǵy mınıstrliginiń derekterine sáıkes, olardyń qaldyǵy jalpy qor kóleminiń shamamen 24%-yn quraıdy.
Naýryz aıynyń basynan bastap eldiń ishki naryǵyna Qytaıdan jańa kókónisterdiń kúndelikti jetkizý uıymdastyryldy. Qazirgi ýaqytta 3200 tonna kartop, 800 tonna sábiz, 14 tonna aq qyryqqabat jetkizildi.
31 naýryz kúni Saýda jáne ıntegratsııa mınıstrliginiń Saýda komıteti, óńirlik ÁKK, iri saýda jelileri, KTZ-Express jáne QazTrade ókilderinen quralǵan delegatsııa erte pisetin ónimderdi satyp alý úshin Ózbekstannyń ońtústik óńirlerine barady.
Baǵanyń tómendeýine Naýryz meıramy kezeńinde ótken merekelik jármeńkeler de qosymsha áser etti. El boıynsha mereke kúnderi 200-den astam taqyryptyq jármeńke ótkizildi. Jalpy, jyl basynan beri 1,5 myń jármeńke uıymdastyryldy. Nauryz sale aktsııasyna 70%-ǵa deıingi jeńildikter usynǵan 300 saýda sýbektisi qatysyp, 4 mıllıonnan astam adam qamtyldy.
Aıta ketelik JI áleýmettik mańyzy bar azyq-túlik ónimderin satý kezinde tıimsiz deldaldardy anyqtaýǵa kómektesetini týraly jazǵan edik.
