Áleýmettik mańyzy bar azyq-túlik óndirýshilerine arnalǵan tarıf jyl sońyna deıin óspeıdi
ASTANA. KAZINFORM — Senbi kúni ótken ınflıatsııany tejeý máseleleri jónindegi kezekti jıynda Premer-mınıstrdiń orynbasary – ulttyq ekonomıka mınıstri Serik Jumanǵarın óńirlik turaqtandyrý qorlaryn jańa ónimmen toltyrý boıynsha kelisim-shart jasasý jumystarynyń jáne «Tarıfti ınvestıtsııaǵa aıyrbastaý baǵdarlamasynyń júzege asyrylý barysy týraly baıandamalardy tyńdady.
UEM Tabıǵı monopolııalardy retteý komıtetiniń tóraǵasy Tımýr Qosymbaevtyń habarlaýynsha, bıylǵa josparlanǵan kommýnaldyq tarıfter baǵasyn kóterý jumystary aıaqtalǵan, al tabıǵı monopolııa sýbektilerinen jańa ótinimder kelip túsken joq.
Sol sebepti, jyl sońyna deıin halyq pen jeńildigi bar tarıf saıasaty qoldanylatyn ÁMAT óndirýshileri úshin tarıf baǵasy óspeıdi. Bul aqyly qyzmetterdiń qymbattaýynyń ınflıatsııaǵa áserin azaıtýǵa múmkindik beredi.
Sonymen qatar óńirlerde jańa ónimge kelisimsharttar jasasý jumysy jedel qarqynmen júrgizilýde. Aýyl sharýashylyǵy vıtse-mınıstri Erbol Tasjúrekovtiń málimetinshe, kartop, pııaz, sábiz jáne qyryqqabat jetkizýge arnalǵan kelisimsharttar 2025–2026 jyldardyń maýsymynda halyqtyń qajettiligin 50% qamtyp otyr.
Máselen, Atyraý, Almaty oblystary men Astana qalasynda pııazǵa degen suranys tolyǵymen jabylǵan. Qaraǵandy, Túrkistan, Abaı, Aqmola oblystary men Almaty qalasynda da jumys qarqyndy. Biraq Aqtóbe oblysynda kókónistiń barlyq túri boıynsha kelisimsharttar jasasý deńgeıi tómen.
Baqylaýdy kúsheıtý maqsatynda Serik Jumanǵarın óńirlerge baryp, turaqtandyrý qorlaryndaǵy kólem men qordyń jetkilikti bolýyn tekseretin arnaıy jumys tobyn qurýdy tapsyrdy.
Aıta ketelik asyl tuqymdy mal sharýashylyǵyn damytýǵa baǵyttalǵan «Igilik» baǵdarlamasy bastaý alatyny týraly jazǵan edik.