Áleýmettik mańyzy bar azyq-túlik óndirýshiler elektr energııasyn jeńildetilgen tarıfpen ala alady
ASTANA. KAZINFORM – Qazaqstanda áleýmettik mańyzy bar azyq-túlik taýaryn óndirýshiler úshin elektr energııasynyń qunyn tómendetýge múmkindik beretin jańa tetik ázirlendi, dep habarlaıdy Tabıǵı monopolııalardy retteý komıteti.
Ulttyq ekonomıka mınıstrligi Qoǵamdyq mańyzy bar naryqta baǵa belgileý qaǵıdalaryna ózgerister engizýdi kózdeıtin buıryq jobasyn ázirledi.
Qujat áleýmettik mańyzy bar azyq-túlik óndirýshilerdi qoldaýǵa jáne elektr energııasy shyǵyndaryn azaıtý arqyly óndiris shyǵynyn tómendetýge baǵyttalǵan.
– Buıryq jobasyna sáıkes, áleýmettik mańyzy bar azyq-túlik taýaryn óndirýshilerge elektr energııasyn qoldanystaǵy bosatý tarıfiniń 20 paıyzyna deıingi tómen baǵamen satyp alý múmkindigin berý usynylady. Jeńildetilgen tarıf tek atalǵan ónimdi óndirýge tikeleı jumsalatyn elektr energııasynyń kólemine ǵana qoldanylady, – delingen habarlamada.
Bul tetik áleýmettik mańyzy bar azyq-túlik baǵasyn turaqtandyrý boıynsha ortalyq memlekettik organmen nemese jergilikti atqarýshy organmen memorandým jasalǵan jaǵdaıda qoldanylady.
Jańa norma nan, un, sút ónimderi, jumyrtqa, qant, et jáne zańnamada belgilengen ózge de áleýmettik mańyzy bar azyq-túlik óndiretin kásiporyndarǵa qatysty bolady.
Komıtettiń málimetinshe, elektr energııasyna ketetin shyǵynnyń azaıýy óndiris shyǵynyn qysqartyp, ónim baǵasyn turaqty deńgeıde ustaýǵa múmkindik beredi.
«Qoǵamdyq mańyzy bar naryqtarda baǵa belgileý qaǵıdalaryn bekitý týraly» buıryqqa ózgerister engizý jobasy qoǵamdyq talqylaý úshin «Ashyq NQA» portalynda ornalastyryldy.
Aıta keteıik, áleýmettik mańyzy bar azyq-túlik baǵasynyń ósý qarqyny tórt ese baıaýlady.
