Áleýmettik mańyzy bar azyq-túlik boıynsha otandyq ónim úlesi 83%-ǵa jetti
ASTANA. KAZINFORM - Qazaqstan Respýblıkasy Saýda jáne ıntegratsııa mınıstrligi otandyq aýyl sharýashylyǵy taýar óndirýshileriniń saýda jelilerine tikeleı qol jetkizýin qamtamasyz etý jumystaryn kúsheıtip jatyr.
Aqmola oblysyna jumys sapary barysynda Saýda jáne ıntegratsııa mınıstri Arman Shaqqalıev Qazaqstandaǵy óndiris mádenıeti men damyǵan ınfraqurylymnyń úlgisine aınalǵan Rodına aýylyna bardy.
Júıeli monıtorıng derekterine sáıkes, áleýmettik mańyzy bar azyq-túlik taýarlary (ÁMAT) boıynsha eldegi sórelerde otandyq ónimderdiń úlesi 83%-ǵa jetti. Jekelegen sanattar boıynsha, mysaly sút ónimderinde, qazaqstandyq brendterdiń úlesi 70%-dan 90%-ǵa deıin ózgerip otyr.
Osy nátıjelerdi bekitý maqsatynda mınıstrlik saýda jelileri, kásipkerler palatalary jáne aýmaqtyq saýda departamentteri arasynda úshjaqty memorandýmdar tetigin belsendi qoldanyp jatyr. Bul kelisimder fermerlerge saýda sórelerine qoljetimdilikti qamtamasyz etse, tutynýshylar úshin artyq ústemesiz ádil baǵany qamtamasyz etedi.
Sondaı-aq «Rodına» JShS jáne «Zenchenko» KT sekildi iri óndirýshilerdiń fırmalyq dúkender jelisin damytýǵa erekshe nazar aýdarylyp otyr. Búginde Astana qalasynda osyndaı 15 saýda orny jumys isteıdi. Jyl sońyna deıin dúkender sanyn 20-ǵa deıin ulǵaıtý josparlanyp otyr. Bul qala turǵyndaryna ónimdi tikeleı óndirýshiden satyp alýǵa múmkindik beredi.
-Bizdiń mıssııamyz — ónimniń egistikten tutynýshyǵa deıingi tolyq tsıfrlyq jolyn qalyptastyrý arqyly árbir qazaqstandyq úshin azyq-túlik qaýipsizdigi men baǵa turaqtylyǵyn qamtamasyz etý. «Saýdanyń tsıfrlyq aınasy» modelin engizý arqyly biz ónimniń tolyq ashyq qozǵalysyn qalyptastyramyz. Búginde sórelerdegi otandyq ónim úlesi 83%-dan asqan kezde, biz úzdik agroaýyldardyń tájirıbesin búkil el boıynsha taratyp, azyq-túlik qaýipsizdigin ár otbasynyń naqty ál-aýqatyna jáne baǵa turaqtylyǵyna aınaldyryp otyrmyz, — dedi Arman Shaqqalıev.
2025 jyly ishki saýda sýbektilerin memlekettik qoldaý jańa deńgeıge kóterildi. Jalpy somasy 67,5 mlrd teńgeni quraıtyn 458 joba iske asyryldy. Bul qarajat saýda nysandaryn jańǵyrtýǵa, ınfraqurylymdy damytýǵa jáne aınalym qarajatyn tolyqtyrýǵa baǵyttaldy.
Sonymen qatar memlekettik qoldaý alýshylarǵa qarsy mindettemeler qoıylady. Olar óz sórelerinde qazaqstandyq ónimderdiń basym bolýyn qamtamasyz etýge tıis.
Inflıatsııalyq qysymdy tómendetý úshin Úkimet «ónimsiz» deldaldardy qysqartatyn tsıfrlyq quraldardy engizip jatyr. Negizgi jobalardyń biri — fermerler men saýda jelilerin tikeleı baılanystyratyn ınnovatsııalyq agromarketpleıs.
Sonymen qatar birqatar óńirde áleýmettik osal toptarǵa arnalǵan tsıfrlyq azyq-túlik vaýcherleri júıesi pılottyq rejımde iske asyrylyp jatyr. Bul júıe fermerlerden tikeleı forvardtyq satyp alý jáne saýda ústemesin alyp tastaý arqyly taýarlardy 25%-ǵa deıin jeńildikpen satyp alýǵa múmkindik beredi.
Qazaqstannyń Eńbek Eri Ivan Adamuly Saýer negizin qalaǵan «Rodına» JShS-niń tabysty tájirıbesin Qazaqstannyń barlyq óńirine taratý josparlanyp otyr.
Osyǵan deıin bıyl azyq-túlik óndirisi 9,5%-ǵa artatyny týraly jazǵan edik.
